Tags-Ehsaas

is yaad kā bhañvar mere ehsās meñ rahā
iz.hār-e-mauj mauj kī nā-guftanī bhī hai

kār-farmā dikhā.ī detā hai
merā ehsās mere jazboñ meñ

gavārā kab mujhe hogā kisī ehsās kā Dhonā
hai qarzā is janam kā is janam meñ hī adā hogā

dard talḳhāba-e-ehsās meñ zam ho ke rahā
qatl-gah paT ga.ī alfāz kī shīrīnī se

kaash duniyā mire ehsās ko vāpas kar de
ḳhāmushī kā vahī andāz sadāoñ jaisā

is tarah nigāheñ mat phero, aisā na ho dhaḌkan ruk jaa.e
siine meñ koī patthar to nahīñ ehsās kā mārā, dil hī to hai

merā ehsās sadiyoñ pe phailā huā
aisā aañsū jo palkeñ badaltā rahā

kabhī TuuTā na afsūn-e-sitam terī huzūrī kā
bahut nazdīk rah kar bhī rahā ehsās-e-dūrī kā

maiñ ne dekhā hai ki aflās ke sahrāoñ meñ
qāfile azmat-e-ehsās ke ruk jaate haiñ

yaas meñ bedārī-e-ehsās kā aalam na pūchh
Thes yuuñ lagtī hai dil pe ta.ana-e-hamrāz se

zehn par jis dam tirā ehsās ġhālib aa gayā
duur tak bikhrā huā lafzoñ kā shīrāza lagā

aaj chāñdī ke tarāzū meñ tulegī har chiiz
mere afkār mirī shā.irī merā ehsās

pyaar meñ kam to nahīñ kam-nigahī bhī us kī
haañ tunak-zarfī-e-ehsās kushāda bhī to ho

guzar rahā huuñ jis ehsās ke azaab se maiñ
qayāmat aisī kisī dil pe kab guzartī hai

merī āñkhoñ ko mirī shakl dikhā de koī
kaash mujh ko mirā ehsās dilā de koī

apne hone kā ab ehsās huā hai kuchh kuchh
tujh se is tishna mulāqāt se pahle kyā thā

kitnā fareb-kār hai ehsās-e-bandagī
ham manzil-e-ḳhudī se bahut duur aa ga.e

ehsās-e-husn ban ke nazar meñ samā ga.e
go laakh duur the vo magar paas aa ga.e

ehsās-e-jurm jaan kā dushman hai 'ja.afarī'
hai jism taar taar sazā ke baġhair bhī

mujh meñ ehsās kyuuñ ho ki aurat huuñ maiñ
zindagī kyuuñ lagūñ? bas zarūrat huuñ maiñ