Tags-Ehsaas

dasht-e-ehsās kī shiddat se nikalnā hai muhāl
dard biite hue manzar kī taraf khīñchtā hai

kareñge aisā vo is kā na thā hameñ ehsās
vo qaul-o-fe.al se apne mukar ga.e chup-chāp

māyūs na ho be-ruḳhī-e-chashm-e-jahāñ se
shā.ista-e-ehsās koī kaam kiye jā

ab jā kar ke dil ko ye ehsās huā
terā pyaar bhī pyaar nahīñ ik sāzish hai

tanhā.ī ke lamhāt kā ehsās huā hai
jab tāroñ bharī raat kā ehsās huā hai

tujh ko dekhā nahīñ mahsūs kiyā hai maiñ ne
aa kisī din mire ehsās ko paikar kar de

jaane kis taraf lekin
har qadam huā ehsās

nahīñ jab quvvat-e-ehsās dil meñ
ġham-e-duniyā surūr-e-jām-e-jam kyā

ghar se gaatā huā niklā to huuñ maiñ naġhma-e-ehsās magar
shahr ke shor meñ dab jaa.eñ na sar lai na badal jaa.e kahīñ

dafn ho jaa.e na ehsās-e-mohabbat dil meñ
ab kahāñ dil kā ḳhayāl ahl-e-ḳhirad rakhte haiñ

pyaar kise kahte haiñ ye ehsās huā hai pahlī baar
mere dil meñ mīThā mīThā dard uThā hai pahlī baar

ghuT ke rah jā.ūñgā be-ehsās ġham-ḳhvāroñ ke pech
aa gayā huuñ apne hī kamre kī dīvāroñ ke biich

abhī kuchh aur kā ehsās phir bhī zinda hai
navāh-e-jism ke asrār ham ne jaane bahut

sham.a kī tarah pighaltā huuñ maiñ lamha lamha
mere ehsās meñ ik sho.ala-jabīñ rahtā hai

maiñ jañg jiit ke jabr-o-anā kī haar gayā
adū pe rahm kā ehsās mujh ko maar gayā

maut ke ba.ad bhī marne pe na raazī honā
yahī ehsās to sarmāya-e-dīñ hotā hai

sochtā huuñ to laraz uThtā hai ehsās-e-anā
dā.era ban ke bhī maiñ vaqt kī purkār meñ thā

jin ko hāsil thā zamāne meñ sukūn-e-iztirāb
apne hī ehsās ke sho.aloñ meñ jal kar rah ga.e

ehsās kī salīb liye chal rahā huuñ maiñ
dasht-e-junūñ meñ shor machāne lagā hai vo

bujh gayā ehsās taarī hai sukūt-e-be-hisī
dard kā daftar gayā sāmān-e-shor-o-shar gayā