Tags-Ehsaas

rāz-e-ulfat maiñ chhupātā to huuñ lekin 'arshad'
Dar hai ehsās kī talḳhī na zabāñ tak pahuñche

uf vo nazreñ jo mohabbat kā bharam rakh na sakeñ
haa.e vo kaif jo ehsās-e-garāñ tak pahuñche

mere ehsās kī qismat meñ hī mahrūmī thī
kabhī sochā na huā aur kabhī chāhā na huā

jis ko is fasl meñ honā hai barābar kā sharīk
mere ehsās meñ tanhā.iyāñ kyuuñ botā hai

chhup ke ehsās meñ vo rahtā hai
vo farishta koī zarūr mirā

pahuñch kar manzil-e-hastī pe ye ehsās hotā hai
ki guzre haiñ yahāñ se aur bhī kuchh kārvāñ pahle

mere ehsās ne ḳhushbū ko bulāyā jab bhī
terī zulfoñ ke mahakte hue naame aa.e

tirī talab terī aarzū meñ nahīñ mujhe hosh zindagī kā
jhukā huuñ yuuñ tere āstāñ par ki mujh ko ehsās-e-sar nahīñ hai

chhoTī chhoTī ḳhvāhishoñ kā qatl hote dekh kar
umr kā ehsās ruḳh par gard ban ke chhā.egā

rahte haiñ yahāñ shāhī dafātir ke mulāzim
jin ko na kuchh ehsās-e-ġharībul-vatanī hai

ġhaflateñ hastī-e-fānī kī batā deñgī tujhe
jo mirā haal thā ehsās-e-fanā se pahle

ye hasrat hai sajā luuñ apne hoñToñ par hañsī meñ bhī
ghaḌī bhar ko mire dil se agar ehsās-e-ġham nikle

karb-e-tanhā.ī mirī ruuh kā kartī hai siñghār
zahr ehsās kā gholūñ to siyah raat kaTe

sahrā kā sulagtā huā ehsās huuñ 'jāmī'
zarroñ kī tarah dahr meñ bikhrā huā tan huuñ

sab apne ā.īne us ne mujhī ko sauñp diye
use shikast kā ehsās thā bahut gahrā

mire ehsās ke ātish-fishāñ kā
agar ho to mire dil tak dhuāñ ho

maiñ us ke ma.anī o maqsad ke sañg chuntī rahī
vo ek harf jo ehsās ko kuchaltā rahā

aa ke vāpas na gayā koī havā kā jhoñkā
TūTte lamhoñ meñ ehsās ke dar baaz rahe

harf jab aatā hai nāmūs-o-vaqār-e-ishq par
shiddat-e-ehsās se rag rag meñ lahrātī hai aag

khone nahīñ detā thā mujhe bhiiḌ meñ ehsās
jakḌe hue mujh ko tirī bāñhoñ kī tarah thā