Tags-Ehsaas

umr bhar zehn meñ chubhtā rahā ik nashtar-e-ġham
jitne ehsās the sab merā muqaddar nikle

kachchī miTTī ke 'farhat-ehsās' zarā paanī meñ sambhal kar
dariyā meñ tum ḳhuub nahāte ho jab bhī mastī aatī hai

mujh ko ehsās ho gunāhoñ kā
kar do bedār āgahī merī

ehsās kī uñglī se Tapakte haiñ sitāre
chubhtā hai mire zehn meñ jab ḳhaar kā saaya

ehsās meñ shadīd talātum ke bāvajūd
chup huuñ mujhe sukūn mayassar ho jis tarah

jaltī āñkhoñ ke motī pighalte rahe aur ehsās ke
reg-zāroñ meñ taptī rahīñ mere ḳhvāboñ kī parchhā.iyāñ

the aisī bad-gumānī meñ nahīñ ehsās ho paayā
hamārī hī kahānī se nikāle jā chuke the ham

ehsās-e-ziyāñ chain se sone nahīñ detā
ronā bhī agar chāhūñ to rone nahīñ detā

rūThne aur manāne ke ehsās meñ hai ik kaif-o-surūr
maiñ ne hamesha use manāyā vo bhī mujhe manā.e to

chand sheroñ meñ kahāñ Dhaltī hai ehsās kī aag
ġham kā ye rañg nikharnā to abhī baaqī hai

bujh na jaa.e kahīñ ehsās ke sho.aloñ kā mizāj
munjamid vaqt hai thoḌī sī havā bhī rakh le

rahnā tum chāhe jahāñ ḳhabroñ meñ aate rahnā
ham ko ehsās-e-judā.ī se bachāte rahnā

zavāl-e-jism ko dekho to kuchh ehsās ho is kā
bikhartā zarra zarra koī sahrā kaisā lagtā hai

ai zindābād farhat-ehsās
maiñ tujh ko salām kar rahā huuñ

mahjūb sā tanhā.ī kā ehsās khaḌā hai
bistar pe baḌī der se ḳhāmosh paḌā huuñ

apnī hī zaat ke mahbas meñ samāne se uThā
dard ehsās kā siine meñ dabāne se uThā

tanz kī sard havā.eñ jo satātī haiñ mujhe
shiddat-e-garmī-e-ehsās ko pī letā huuñ

tole ehsās kī kasauTī par
hai judāgāna zāviya dil kā

koī ehsās mukammal nahīñ rahne detā
dard kā saath musalsal nahīñ rahne detā

tere ehsās kī shiddat se bharā baiThā huuñ
ab na inkār na iqrār koī mastī ho