Tags-Eid

jis kī tābish meñ daraḳhshānī hilāl-e-īd kī
ḳhaak ke māyūs matl.a par kiran ummīd kī

kisī iid par yā basant par vo milegā umr ke ant par
maiñ ye sochtā huuñ ki ye bhī koī bahāna ho kahīñ yuuñ na ho

bādbāñ naaz se lahrā ke chalī bād-e-murād
kārvāñ iid manā qāfila-sālār aayā

va.ada-e-vasl diyā iid kī shab ham ko sanam
aur tum jā ke hue shīr-o-shakar aur kahīñ

shaad hote haiñ dekh kar āshiq
sahar-e-īd kā hai naqsha peT

intizām-e-roz-e-ishrat aur kar ai nā-murād
iid aatī hī rahī māh-e-siyām aa hī gayā

hilāl-e-īd ne dī hai yahī diloñ ko ḳhabar
pukārtā hai himāla se abr uTh uTh kar

dekhā hilāl-e-eid to aayā terā ḳhayāl
vo āsmāñ kā chāñd hai tū merā chāñd hai

musalmāñ qarz le kar eid kā sāmāñ ḳharīdeñge
jo daanā haiñ vo becheñge jo haiñ nādāñ ḳharīdeñge

shāḳhoñ se milī jaatī haiñ shāḳheñ vo asar hai
kahtī hai nasīm-e-saharī īd-e-sahar hai

mere aage milī vo ġhairoñ se
hai moharram mujhe ye iid nahīñ

mar ga.e lākhoñ shahīd-e-nāz kuchh parvā nahīñ
vo tamāshā-e-hilāl-e-īd-e-qurbāñ meñ rahā

vo roz ham ko guzartā hai jaise iid kā din
kabhī jo shakl tumhārī sahar ko dekhte haiñ

luTī har-gām par ummīd apnī
moharram ban ga.ī har iid apnī

falak par ik chāñd iid kā roz dekhne ko kahāñ se lā.ūñ
nazar kī sar-mastiyāñ na pūchho kahīñ sar-e-bām hī milegī

ḳhushī manāte ho kahte ho mujh ko iid 'nishāt'
magar maiñ ḳhuun kī holī bhī huuñ jalāo mujhe

jab qais pahāḌ is sar se Tale iid aa.ī tab aa.ī jaan meñ jaan
tā der ajab aalam meñ rahe hoñToñ ko milā.e jaam se ham

sajtī thī kabhī tan pe jo thī eid kī achkan
sajte the kabhī ham, to kabhī eid kī achkan

baġhal-gīr aarzū se haiñ murādeñ aarzū mujh se
yahāñ is vaqt to ik iid hai tum jalva-gar kyā ho