Tags-Aansoo

aaj sochā to aañsū bhar aa.e
muddateñ ho ga.iiñ muskurā.e

ek muddat huī āñkhoñ se bahe the aañsū
dāman-e-shauq magar aaj bhī tar kaisā hai

mere dāman ko dhone vaalā hai
ek aañsū jo hai rumāl ke bech

nikal aate haiñ aañsū hañste hañste
ye kis ġham kī kasak hai har ḳhushī meñ

sāvan ek mahīne 'qaisar' aañsū jīvan bhar
in āñkhoñ ke aage bādal be-auqāt lage

mire jazbe mirī shahādat haiñ
bahte aañsū shahīd kartī huuñ

laboñ par tabassum to āñkhoñ meñ aañsū thī dhuup ek pal meñ to ik pal meñ bārish
hameñ yaad hai bātoñ bātoñ meñ un kā hañsānā rulānā rulānā hañsānā

na koī ḳhvāb baaqī hai na aañsū ḳhushk āñkhoñ meñ
tahī-dastoñ kī gum-sum nauha-ḳhvānī kā tamāshā kar

ġham agar palkoñ pe tham jaa.e to aañsū kahiyo
aur bah jaa.e to maujoñ kī ravānī kahnā

terī nādānī ye terā zo.am hai tū yaad rakh
ek hī aañsū tirī duniyā bahā le jā.egā

is ḳhaak ko allāh ne baḳhshe haiñ vo aañsū
kartī hai chamak jin kī sitāroñ ko araq-nāk

ġham bhī hai udāsī bhī tanhā.ī bhī aañsū bhī
sab kuchh to mayassar hai dil māñge to kyā māñge

us ke aañsū hī batāte the na ab lauTegā vo
is se pahle to bichhaḌte vaqt yuuñ rotā na thā

uktā gayā hai saath ke in qahqahoñ se dil
kuchh roz ko bichhaḌ ke ab aañsū bahā.eñ ham

merī ā.ankhoñ meñ kisī ne nahīñ dekhe aañsū
phir bhī ye sach hai ki giryāñ huuñ hamesha kī tarah

inhī hairat-zada āñkhoñ se dekhe haiñ vo aañsū bhī
jo aksar dhuup meñ mehnat kī peshānī se Dhalte haiñ

qadam qadam par in kī zarūrat paḌtī hai
aañkh se kahnā aañsū pas-andāz kare

koī yahāñ muskurā rahā hai kisī ke aañsū chhalak rahe haiñ
sunā hai maiñ ne mushā.ere meñ huā hai 'tālib' ġhazal-sarā phir

yaad un kī satātī rahī rāt-bhar
aañkh aañsū bahātī rahī rāt-bhar

raat Dhaltī rahī ham sisakte rahe
sham.a aañsū bahātī rahī rāt-bhar