Tags-Aansoo

kab tak ye taqdīr kā ronā aao kuchh tadbīr kareñ
aañkh meñ aañsū chāk-e-garebāñ darshāne se kyā hogā

sham.a ke rone pe bas saaf hañsī aatī hai
ātish-e-dil kahīñ kam hotī hai chaar aañsū se

sāvan kī purvā.ī ne kyā dukhtī choT dikhā.ī hai
kaise aañsū umDe haiñ jab yaad tumhārī aa.ī hai

itnā hañstī thī ki aañsū nikal aate the 'sabā'
ye na.ī baat bahāroñ kī sahelī chup hai

terī rotī huī āñkheñ haiñ mirī āñkhoñ meñ
varna patthar meñ kahāñ jaan ki aañsū nikle

kitne ḳhvāboñ ko nichoḌā hai to un āñkhoñ se
aaj Tapkā hai ye jaltā huā aañsū yaaro

jo palkoñ par mirī Thahrā huā hai
vo aañsū ḳhuun meñ Duubā huā hai

sitāra to kabhī kā jal-bujhā hai
ye aañsū sā tirī palkoñ pe kyā hai

letā hī nikaltā hai mirā laḳht-e-jigar ashk
aañsū nahīñ goyā ki ye hiire kī kanī hai

aap ik buuñd bhī pī leñ to ġhashī aa jaa.e
ġham ke aañsū jo asīrān-e-qafas piite haiñ

aañkh meñ aañsū kā aur dil meñ lahū kā kaal hai
hai tamannā kā vahī jo zindagī kā haal hai

aur us ke sivā kuchh kah na sake pūchhā jo kisī ne haal hai kyā
āñkhoñ se aañsū bahne lage hāthoñ se kaleja thaam liyā

mah-o-ḳhurshīd ban kar āsmānoñ par hue raushan
do aañsū vo mirī āñkhoñ se jo shām-e-alam nikle

vo tirī yaad ke aañsū the jo bahne na diye
chashm vīrāñ meñ ruke shahr-badar hone tak

kaisā harjā.ī ho gayā aañsū
merā dāman hai aur giilā na.iiñ

ḳhvāb aur saiñt kar rakheñ āñkheñ
in se aañsū to ik sambhaltā na.iiñ

umr bhar maiñ apne aañsū āb-sūrat pī sakūñ
chāhtā huuñ is tarah kī tishnagī mujh ko mile

Thaharte haiñ zarā palkoñ pe aañsū
sitāre TūTte haiñ jhilmilā ke

mirī jaarī haiñ aañsū aah qāsid
shitābī kah ye us ko mājrā jā

jab kabhī 'hassās' barfānī havā tan par lagī
yaad aa.ī gaañv kī aañsū piyā hai barf barf