Tags-Aansoo

barastā hai kaif-e-shabāb-e-mohabbat
har aañsū hai jām-e-sharāb-e-mohabbat

istaqāmat ai mire dair-āshnā-e-ġham-gusār
ek aañsū hai bahut husn-e-nadāmat ke liye

hañsī ke saath bhī aañsū nikal aate haiñ āñkhoñ se
ḳhushī to merī qismat meñ barā.e-nām hai shāyad

kyā kahūñ kis tarah se jiitā huuñ
ġham ko khātā huuñ aañsū piitā huuñ

pī liyā lauT gayā ḳhushk huā kuchh to batā
kyā huā aañkh se aañsū vo Tapakne vaalā

ye jāntā huuñ ki tū ne liyā thā rok use
magar vo ātishīñ aañsū mujhe jalā na gayā

tere mere beach nahīñ hai ḳhuun kā rishta phir bhī kyuuñ
terī aañkh ke saare aañsū merī aañkh se bahte haiñ

ek aañsū bhī asar jab na kare ai 'tishna'
fā.eda rone se ai dīda-e-tar kuchh bhī nahīñ

laboñ par ḳhāmushī āñkhoñ meñ aañsū dil meñ betābī
maiñ un kī bazm-e-ishrat se qayāmat le ke aayā huuñ

palkoñ pe larazte rahe aañsū kī tarah ham
ghar meñ tire mahkā kiye ḳhushbū kī tarah ham

is daf.a phir jab vilādat kā huā thā silsila
aa ga.e ā.ankhoñ meñ aañsū maiñ ne ro kar yuuñ kahā

ḳhuun ke aañsū ham apne haal par rone lage
pahle single ho rahe the ab double hone lage

Duub jaate haiñ umīdoñ ke safīne is meñ
maiñ na mānūñgā ki aañsū hai zarā sā paanī

soz-e-ġham hī se mirī aañkh meñ aañsū aa.e
sochtā huuñ ki ise aag kahūñ yā paanī

na rahe aañkh meñ bhī dil se nikal kar aañsū
jā-ba-jā un ko liye phirtā hai daanā paanī

vahī aañsū vahī maazī ke qisse
jise dekho kaTe ko kāTtā hai

hue jab fart-e-ġham se ḳhushk aañsū
vo ye samjhe ki mujh ko ġham nahīñ hai

sab kā dāman motiyoñ se bharne vaale
merī aañkh meñ bhī ik aañsū rakhnā thā

kaash tum mujh se nafrat kartīñ to maiñ vāpas tanhā.ī ke tane meñ chhup jaatā
jahāñ mere aañsū shāḳhoñ par ugte

nisār-e-dost hai ye motiyoñ kā be-bahā maalā
har ik aañsū ko ham TuuTā huā ik dil samajhte haiñ