Tags-Fasla

manzil-o-rāh meñ kabhī itnā to fāsla na thā
rāhbaro ḳhatā-muāf ye koī rāhbarī nahīñ

maut zindagī meñ kuchh fāsla nahīñ lekin
phir bhī aane jaane meñ umr biit jaatī hai

fāsla rakhiye diloñ meñ magar itnā bhī nahīñ
darmiyāñ jaise koī āhanī dīvār bhī ho

fāsla itnā na rakhnā thā ḳhudā
is zamīñ ko āsmāñ dete hue

ik fāsla qaa.em hai ba-dastūr ba-har-hāl
hāsil mujhe us shaḳhs kī qurbat bhī bahut hai

rāh-e-dunyā se nahīñ dil kī guzargāh se aa
fāsla garche ziyāda hai pe yuuñ kuchh kam hai

bahut nazdīk the tasvīr meñ ham
magar vo fāsla jo dikh rahā thā

tai mujh se zindagī kā kahāñ fāsla huā
hai merā ġham ke phuul se dāman bharā huā

ek lambā fāsla hai jaan se pahchān tak
shakl jo jaanī ga.ī vo bhī na pahchānī ga.ī

dard ke sahāre kab talak chaleñge
saañs ruk rahī hai fāsla baḌā hai

hameñ ek din ḳhatm karnā paḌegā
hamāre diloñ meñ jo kuchh fāsla hai

kisī kī ruuh tak ik fāsla ḳhayāl kā thā
kabhī kabhī to ye duurī rahī-sahī bhī na thī

thī hausle kī baat zamāne meñ zindagī
qadmoñ kā fāsla bhī yahāñ ek jast thā

āñkhoñ ke sāmne koī manzar nayā na thā
bas vo zarā sā fāsla baaqī rahā na thā

bhulāne baiThī huuñ saarī duniyā dhaḌak rahā hai vo mere dil meñ
jo dūriyāñ haiñ samundaroñ kī vo fāsla hai bas ik sadā kā

fāsla to bahut hī kam hai magar
darmiyāñ meñ ka.ī masā.il haiñ

dī hai dard-e-dil pe us ke dastak
tai hogā ye fāsla kabhī to

furāt-e-fāsila se dajla-e-duā se udhar
koī pukārtā hai dasht-e-nainavā se udhar

fāsla qurb banā qurb bhī aisā ki mujhe
dil kī dhaḌkan tire qadmoñ kī sadā lagtī hai

har rāsta kahīñ na kahīñ muḌ hī jā.egā
rishtoñ ke biich thoḌā bahut fāsla bhī rakh