Tags-Fasla

ye masāfateñ shab-e-tār kī ye na ḳhatm hone ke silsile
abhī fāsla rag-e-jāñ se hai to hanūz garche zarā sā hai

ik muddat se fāsla qaa.em sirf hamāre biich hī kyuuñ
sab se miltā rahtā huuñ maiñ sab se miltā tū bhī hai

añdherī khaa.ī se goyā safar chaTān kā thā
jo fāsla mire ghar se tire makān kā thā

agar ho vaj.h-e-ta.alluq to ham se duur raho
koī bhī fāsla ham darmiyāñ na rakkheñge

ek lamhe meñ kaTā hai muddatoñ kā fāsla
maiñ abhī aayā huuñ tasvīreñ purānī dekh kar

ab tū hī ye fāsla tai kar sake to kar bhī le
maiñ to ḳhud apnā hī ziina ho gayā honā hī thā

dard ke rishtoñ kī apnī ik alag hai dāstāñ
fāsla hotā hai phir bhī fāsla hotā nahīñ

dostī ko apnī majbūrī nahīñ samjhā kabhī
fāsla maiñ ne barābar darmiyāñ rahne diyā

tamām umr jise DhūñDte rahe 'ā.alī'
kahīñ milā bhī agar vo to fāsla ban kar

ik nadī ke do kināroñ aisā hai
fāsla hamāre darmiyān kā

sahar anjān sī maġhmūm sā ḳhvāb-e-vafā kyuuñ hai
na jaane qurbatoñ ke naam se ye fāsla kyuuñ hai

hamārī qurbatoñ meñ fāsla na rah jaa.e
qadam se lipTā huā rāsta na rah jaa.e

use band aañkh se maiñ dekh to luuñ
magar phir umr-bhar kā fāsla hai

dhanak dīvār ke raste meñ haa.il
vagarna jast-bhar kā fāsla hai

tum zamīnoñ ko nāpte rahnā
kā.enātī hai fāsla merā

tū to shah-rag ke paas thā lekin
tai hamīñ se ye fāsla na huā

kyuuñ javār-e-manzil meñ sust-e-gām haiñ raahī
qurb kā yaqīñ shāyad fāsla baḌhātā hai

sū-e-manzil piiTh thī āvārgī jaarī rahī
fāsla har gaam par baḌhtā rahā chalte rahe

ek hī miTTī se ham donoñ bane haiñ lekin
tujh meñ aur mujh meñ magar fāsla yuuñ kitnā hai

khīñch lī thī ik lakīr-e-nā-rasā ḳhud darmiyāñ
fāsla-dar-fāsla-dar-fāsla honā hī thā