Tags-Fasla

tum ne kaisā ye rābta rakkhā
na mile ho na fāsla rakkhā

diyā thā jis ko zamāne ne tere qurb kā naam
mire hī qadmoñ se vo fāsla nikal aayā

maiñ terī zaat meñ gum ho sakā na tū mujh meñ
bahut qarīb the ham phir bhī fāsla to rahā

merī dastak-e-vahshat aaj rok lo varna
fāsla bahut kam hai haath se garebāñ tak

hoñToñ ke paas aa na sakā jaam umr-bhar
hālāñki fāsla ye koī fāsla na thā

fāsloñ meñ rahā qurbatoñ kā gumāñ
qurbatoñ meñ kahīñ fāsla rah gayā

vaqt aur nā-vaqt ke mā-bain
kitnā fāsla

tum zamāne kī baat karte ho
merā mujh se bhī fāsla hai bahut

apnā ham-sāya hai lekin fāsla barsoñ kā hai
aisī qurbat itnī duurī jis meñ hairānī bhī hai

zindagī ik dā.era hai gar muḳhālif bhī chaleñ
fāsla un dūriyoñ kā muḳhtasar ho jā.egā

maqām-e-insāñ maqām-e-yazdāñ meñ fāsla hai bas ik qadam kā
jahāñ malegī ḳhudī kī sarhad vahīñ had-e-be-ḳhudī milegī

husn vo shai hai ki jis kī koī sarhad hī nahīñ
vaqt be-ma.anī hai aur fāsla ik dhoka hai

ḳharāb vaqt hai ab fāsla hī behtar hai
kabhī mileñge jo māhaul pur-sukūn milā

bahut kam fāsla ab rah gayā hai
biphartī āñdhiyoñ se bādbāñ tak

yak-laḳht aa ke aaj vo mujh se lipaT gayā
jo fāsla diloñ meñ thā ashkoñ meñ zam huā

dil ḳhuuñ hai dil kā haal raqam ho to kis tarah
dil se qalam kā fāsla kam ho to kis tarah

judā hue to zamān o makāñ ke buad ke saath
jo raah meñ thā diloñ meñ vo fāsla aayā

fāsla to hai magar koī fāsla nahīñ
mujh se tum judā sahī dil se tum judā nahīñ

aap se mil ke to kuchh aisā lagā
fāsla aur baḌhā ho jaise

har ek bachcha hai ek bachcha na hai kisī kā kabhī adū vo
ye bhed bhaav ye fāsla sab ḳhud apnā paidā kiyā huā hai