Tags-Friendship

ishq par dostī kā chehra hai
ghaav dekho ye kitnā gahrā hai

bahut purānā ta.alluq ye un parindoñ se
magar maiñ samjhī nahīñ un kī dostī ab tak

jafā-dost us ko kahtā hai koī koī vafā-dushman
hamāre saath to us ne nibāhī dostī achchhī

hasīnoñ se faqat sāhib-salāmat duur kī achchhī
na un kī dostī achchhī na un kī dushmanī achchhī

tumhārā tajraba kyā kah rahā hai
karoge phir kisī se dostī kyā

ye dushmanī hai saaqī yā dostī hai saaqī
auroñ ko jaam denā mujh ko dikhā dikhā ke

na 'jahāñdār' jaane thā ai 'mīr'
dostī mudda.ī-e-jānī thī

jal-bujhe tab khulā patañgoñ par
sham.a aur dostī zabānī thī

go ba-zāhir vo ġhair se thā do-chār
ham se bhī dostī nibhānī thī

thā ye ik imtihāñ tabī.at kā
varna nāseh se dostī kaisī

sukh se bhī to dostī kabhī ho
dukh se hī gale milūñ kahāñ tak

shā.erī karte raho lekin rahe itnā ḳhayāl
dushmanoñ se dostī kā hausla baaqī rahe

vo hī hamārā tarīq-e-ulfat ki dushmanoñ se bhī mil ke chalnā
ye ek sheva tirā sitamgar ki dost se dostī na karnā

vāh-rī aql tujh se dushman se
dostī kā gumān rakhtā huuñ

kaash ham log laḌ ga.e hote
aap kī dostī kā ronā hai

aaj apne dushmanoñ se khul ke laḌ saktā nahīñ
dushmanī ke rāste meñ dostī dīvār hai

dostī aur dushmanī kā mazā
dost kī dushmanī se miltā hai

muḳhālifat hai khulī ab na dostī 'ahsan'
ghuTī ghuTī sī fazāoñ se ham guzarte haiñ

ulfat milī ḳhulūs milā dostī milī
har dil meñ ham ko apnī hī tasvīr sī milī

taqāzā maslahat kā thā havā se dostī kar leñ
charāġhoñ ko ujāle tak yūñhī har taur jalnā thā