Tags-Friendship

rahī hai hazrat-e-yazdāñ se dostī merī
rahā hai zohd se yārāna ustuvār merā

dushmanī peḌ par nahīñ ugtī
ye samar dostī se miltā hai

dekh kar dostī kā haath baḌhāo
saañp hote haiñ āstīnoñ meñ

pyaar dil kā saudā hai aql dil kī bīmārī
dostī ke parde meñ dostī se mat khelo

dil-barāñ kī to dostī ma.alūm
āshiqāñ ke qarār par qurbān

dushmanī mujh se terī teġh ne kī
dostī imtihān tak pahuñchī

na pūchho yagānoñ kī begāngī ko
ye sab dost meñ dostī ho rahī hai

dostī aur kisī ġharaz ke liye
vo tijārat hai dostī hī nahīñ

insān-dostī ke taqāzoñ kā silsila
insān-dushmanī kī hadoñ se milā huā

dostī kar ke havā se jo jalā deñ ghar ko
un charāġhoñ se ujālā nahīñ māñgā jaatā

dushmanī larzāñ hai yaaro dostī ke sāmne
tīrgī tharrā rahī hai raushnī ke sāmne

is qadar āsāñ na hogī har kisī se dostī
āshnā.ī meñ tirā me.aar ban jā.eñge ham

kitāb vaqt kī āñdhī meñ khul ga.ī shāyad
havā meñ uḌ gayā derīna dostī kā varaq

ye kaun log haiñ mire idhar udhar
vo dostī nibhāne vaale kyā hue

vārid koh-e-bayābāñ jab meñ dīvāna huā
kohkan se dostī majnūñ se yārāna huā

tū Thiik kahtā hai ai dost Thiik kahtā hai
ki ham hī qābil-e-tajdīd-e-dostī na rahe

ye mohabbat hai dostī to nahīñ
ma.azarat shukriye tau hoñge hī

ye sach hai mil baiThne kī had tak to kaam aa.ī hai ḳhush-gumānī
magar diloñ meñ ye dostī kī numūd hai rāhat-e-bayāñ se

dushman ga.e to kashmakash-e-dostī ga.ī
dushman ga.e ki dost hamāre chale ga.e