Tags-Friendship

jo ham aa.e to botal kyuuñ alag pīr-e-muġhāñ rakh dī
purānī dostī bhī taaq par ai mehrbāñ rakh dī

usī ke dam pe to ye dostī bachī huī thī
hamāre biich meñ jo ham-sarī bachī huī thī

usī ke dam pe manāyā thā us ne jashn mirā
ki dushmanī meñ bhī jo dostī bachī huī thī

ye sikhāyā hai dostī ne hameñ
dost ban kar kabhī vafā na karo

vaqt rūThā rahā bachche kī tarah raah meñ koī khilaunā na milā
dostī kī to nibhā.ī na ga.ī dushmanī meñ bhī adāvat na huī

yuuñ bhī to chalā na kaam apnā
dushman se bhī ham ne dostī kī

laakh ḳhush-gumāñ duniyā bāhamī ta.alluq ko
dostī kaheñ lekin dostī na samjhā jaa.e

itne paa.e haiñ dostī meñ fareb
ab kisī kā bhī e'tibār nahīñ

saarā manzar hī ajnabī hai yahāñ
sirf ik vahm-e-dostī hai yahāñ

ye lag rahā hai ki nā-ḳhush ho dostī meñ tum
tumhāre haath meñ tiir o kamān de duuñ kyā

mirī nazar meñ hai anjām is ta.āqub kā
jahāñ bhī dostī jaatī hai dushmanī jaa.e

tulū-e-sub.h pe hotī hai aur bhī namnāk
vo aañkh jis kī sitāroñ se dostī ho jaa.e

phuul khulte hī titlī bhī aa.ī
kyā koī dostī purānī hai

tujhe kaun jāntā thā mirī dostī se pahle
tirā husn kuchh nahīñ thā mirī shā.irī se pahle

dostī kā maiñ ne kab da.avā kiyā
duur kī sāhab salāmat hī sahī

phir 'vasiyya' se dostī kā ḳhayāl
ye batā deñ ḳhayāl kyuuñ aayā

ai dost miT gayā huuñ fanā ho gayā huuñ maiñ
is daur-e-dostī kī davā ho gayā huuñ maiñ

aaj hai man meñ ran paḌā aaj kī rakkho laaj
jhūTī kal kī dostī jhūTe kal ke saath

bartāv is tarah kā rahe har kisī ke saath
ḳhud ko liye diye bhī raho dostī ke saath

shikva na karūñ maiñ tā-lab-e-gor
dushman bhī kahe ki dostī kī