Tags-Friendship

dahr meñ 'sālik' ye phailā hai nifāq
dostī bhī dushmanī kī baat hai

har ik mahāz pe dushman ko jis se maat huī
vo apne dostoñ kī dostī se haar gayā

dostī ḳhūn-e-jigar chāhtī hai
kaam mushkil hai to rasta dekho

yuuñ to āġhāz-e-mohabbat meñ baḌe da.ave the
dostī pahlī mulāqāt se aage na baḌhī

ab imtiyāz-e-dushmanī-o-dostī kise
hālāt ho ga.e haiñ ajab apne shahr meñ

fā.eda kyā soch āḳhir tū bhī daanā hai 'asad'
dostī nādāñ kī hai jī kā ziyāñ ho jā.egā

jafā kī tarah mujhe tark-e-dostī bhī qubūl
malāl jab bhī na thā mujh ko aur ab bhī nahīñ

'tauqīr' kar chukā thā samundar se dostī
kashtī bhañvar se us kī guzartī chalī ga.ī

maiñ kis ummīd pe dāman kisī kā thaam luuñ 'aḳhtar'
ki sab se dostī meñ ab ḳhasāre ek jaise haiñ

tujh se ai sañg-e-sadā is reza reza daur meñ
ik zarā se dil kī ḳhātir dostī karnā bhī kyā

aise hī be-ḳhulūs ke hai dostī harām
jaise ki ham namāz adā be-vuzū kareñ

aa.egā mujh se dostī karne
jab vo nāḳhun ko tez kar legā

ab talak khīñch khīñch jaur-o-jafā
har tarah dostī nibāhī hai

dostī us ne jo mujh se garm kī
dushmanoñ ko 'azfarī' kuchh jhal paḌī

ādāb-e-dostī se to vāqif kabhī na the
tahzīb-e-dushmanī se bhī nā-āshnā rahe

haiñ sabhī kī apnī zarūrateñ koī kaise bāñTe mohabbateñ
na ḳhulūs hai na hai dostī tire gaañv meñ mire shahr meñ

tiir o kamān aap bhī 'mohsin' sambhāliye
jab dostī kī aaḌ meñ ḳhanjar dikhā.ī de

yahāñ to dostī nibhe na dushmanī
zamīñ hai jis kī āsmāñ usī kā hai

dostī aur dushmanī ke naam se
qaid huuñ kis kis ke andar ai ḳhudā

ham charāġhoñ se kareñge dostī kī baat ab
ye añdheroñ ne kiyā hai faisla apnī jagah