Tags-Friendship

dostī par jis kī mujh ko naaz ho
dost merā ek bhī aisā na thā

dostī apnī jagah aur dushmanī apnī jagah
farz ke anjām dene kī ḳhushī apnī jagah

kahīñ ḳhulūs kahīñ dostī kahīñ pe vafā
baḌe qarīne se ghar ko sajā ke rakhte haiñ

ye kaisī us kī hai dostī ye batā to mujh ko dil-e-hazīñ
nahīñ jis ko duur kā vāsta use duur hī se salām hai

huī muddateñ ai dil-e-hazīñ na payām hai na salām hai
ki usī ko kahte haiñ dostī ki usī kā dostī naam hai

dostī kā bhī tujhe paas na aayā he he
tū ne dushman se kiyā merā gilā mere ba.ad

itnī gurez-pā to na thī umr-e-dostī
ai ḳhanda-e-ḳhafī tire iqrār kyā hue

kartā hai vo jafā to kare maiñ vafā karūñ
yuuñ apnī dostī kā farīza adā karūñ

maiñ bahut akelā huuñ
tum mujh se dostī kar lo

satā lo jis qadar chāho adāoñ se jafāoñ se
qasam khātā huuñ gar hogī tumhīñ se dostī hogī

are nādān tujh ko kaash ye ma.alūm ho jaatā
ki terī dushmanī hī merī vaj.h-e-dostī hogī

kahe hai dil ye ki aise se dostī hai abas
burā.iyoñ kā jo us kī ḳhayāl laatā huuñ

mas.ale dostī ke hal na hue
guftugū darmiyān se TuuTī

'shā.ir' un kī dostī kā ab bhī dam bharte haiñ aap
Thokareñ khā kar to sunte haiñ sambhal jaate haiñ log

agarche miltā bhī un ko unhī sā saudā.ī
fareb-e-dostī 'ḳhālid' ke sar hī jaanā thā

dushman ga.e to kashmakash-e-dostī ga.ī
dushman ga.e ki dost hamāre chale ga.e

hamesha jo bharte the dam dostī kā
vahī dushman-e-jāñ hamāre hue haiñ

is ḳhatā ne mujh ko bhī sharmsār kar Daalā
shahr ke ra.īsoñ se dostī na thī apnī

baḌhā rahā hai mirī samt dostī kā haath
zarūr baat koī us kī āstīn meñ hai

vo dostī to nahīñ dostoñ kī fitrat hai
mire liye jo mire yaar le ke aa.e haiñ