Tags-Gaon

havā ke ruḳh pe mirā gaañv hī na thā varna
jo muTThiyoñ meñ bharī thī vo ḳhaak uḌā detā

aḳhroT khā.eñ tāpeñ añgeThī pe aag aa
raste tamām gaañv ke kohre se aT ga.e

ye bolā dillī ke kutte se gaañv kā kuttā
kahāñ se sīkhī adā tū ne dum dabāne kī

khultī hai roz shaam ko ik champa.ī dhanak
gaañv ke us makāñ pe jo dariyā ke paas hai

raas aa ga.ī hasīnoñ ko shahroñ kī raushnī
mausam bahut udaas hai gaañv meñ in dinoñ

ham āvāra gaañv gaañv bastī bastī phirne vaale
ham se priit baḌhā kar koī muft meñ kyuuñ ġham ko apnā le

ho jaise ek hī kumbe kī saarī ābādī
fazā hamāre mohalle kī gaañv jaisī hai

ye vahī gaañv haiñ fasleñ jo ugāte the kabhī
bhuuk le aa.ī hai in ko to nagar meñ rakh lo

mujhe to gaañv kī miTTī hai jaan se bhī aziiz
vahāñ kī galiyoñ meñ kyā kyā adā.eñ merī haiñ

ḳhush-qismat haiñ vo jo gaañv meñ lambī taan ke sote haiñ
ham to shahr ke shor meñ shab-bhar apnī jaan ko rote haiñ

havā ke jhoñke idhar jo aa.eñ to un se kahnā
ye sab ma.ābid ye shahr gaañv

so apne shahr ke raunaq kī ḳhair māñgnā tum
maiñ apne gaañv se ik shaam le ke aa rahā huuñ

tū ye na pūchh mire gaañv meñ haiñ ghar kitne
ye pūchh kaun se ghar meñ azaab kitne haiñ

gumān gaañv se maiñ chalā thā yaqīn kī manziloñ kī jānib
magar tavahhum ke jañgaloñ meñ hī rāsta ḳhatm ho gayā hai

shahroñ meñ aa ke nuur ke sāñche meñ Dhal ga.ī
miTTī vahī ki raakh thī galiyoñ meñ gaañv kī

masjid kā khañDar thā na vo mandir hī kā malba
jo gaañv meñ jhagḌā thā vo Tiile ke liye thā

shahr kī is bhiiḌ meñ chal to rahā huuñ
zehn meñ par gaañv kā naqsha rakhā hai

pūchheñge mujh ko gaañv ke sab log ek din
maiñ ik purānā peḌ huuñ tū mat girā mujhe

shaam aate hī utar aa.e mire gaañv meñ rañg
jis ke ye rañg the jaane vo qabā kis kī thī

hai tazādoñ kā chaman merā vajūd
fasl-e-gul kā marsiya gā.uñgā maiñ