Tags-Gaon

hamāre gaañv kā luhār ab darāñtiyāñ banā ke bechtā nahīñ
vo jāntā hai fasl kāTne kā vaqt kaT gayā saroñ ko kāTne ke shaġhl meñ

haiñ hamāre gaañv meñ ik maulvī
jo bichāre haiñ bahut nādār bhī

gaañv rafta rafta bante jaate haiñ ab shahr
qarya qarya phail rahā hai tanhā.ī kā zahr

pakkī saḌak ke dāhne qabreñ kuaañ vo gaañv
gaañv kī or-chhor samāñ sīm-thūr kā

is gaañv ke nasheb meñ bahtī hai ik nadī
naddī pe ek peḌ jhukā hai khajūr kā

koī naġhma dhuup ke gaañv sā koī naġhma shaam kī chhāñv sā
zarā in parindoñ se pūchhnā ye kalām kis kā kalām hai

is shahar-e-kasāfat meñ aa kar ojhal hue ā.ankhoñ se manzar
vo gaañv kā sabza vo bahr-o-bar vo dhuup vo barq-o-bārāñ bhī

hamārā gaañv fasādoñ kī zad se duur rahā
agarche log sharārat meñ taaq sab hī the

bachpan ke sab nuqūsh nigāhoñ meñ phir ga.e
kuchh din jo apne gaañv Thaharnā paḌā mujhe

ḳhvāb sach karne chalā thā gaañv se maiñ shahr ko
niiñd bhī kho kar yahāñ 'ālok' pachhtātā huuñ maiñ

zamīn bech ke ḳhush ho rahe ho tum jis ko
vo saare gaañv ko bāzār karne vaalā hai

tumhāre baad ujāle bhī ho ga.e ruḳhsat
hamāre shahr kā manzar bhī gaañv jaisā hai

meñ apne shahr ke naqsh-o-nigār bhuul gayā
kisī ne luuT liyā mujh ko chaaT gaañv meñ

piilā thā chāñd aur shajar be-libās the
tujh se bichhaḌ ke gaañv meñ saare udaas the

zaḳhmoñ se bhare chaman meñ rah kar
phūloñ se mahakte giit gā.ūñ

nazar na aa.ī kabhī phir vo gaañv kī gorī
agarche mil ga.e dehāt aa ke shahroñ se

mere gaañv meñ aa.ī rail
bachcho nahīñ ye koī khel

jo tum se pahle aa.e the un kī kāristānī dekho
gaañv se nikle ho to ab shahroñ kī vīrānī dekho

kahīñ sarsoñ kā talātum kahīñ kaahū kā sukūt
ek se ek haiñ gaañv ke nazāre mere

maiñ aaj gaañv meñ chhoḌe to jā rahā huuñ tumheñ
duā karo ki mujhe shahr kī havā na lage