Tags-Aashiq

haath ham se milāo ai muusā
āshiq-e-rū-e-yār ham bhī haiñ

fahrist le ke aa.e haiñ āshiq tire sabhī
ai kaash mere naam pe hī saad ho sake

āshiq hue haiñ aap bhī ek aur shaḳhs par
āḳhir sitam kī kuchh to mukāfāt chāhiye

vaise hī kaahe ye kaam gul-rū
āshiq hī na go hazār hove

āshiq ko tere laakh koī rahnumā mile
terā patā milā hai na terā patā mile

bahr-e-ġham bhī hai kabhī āshiq ḳhasta ke liye
hai kabhī sāhil-e-ishrat bhī tumhārā chehra

maiñ parī-zādoñ kā āshiq huuñ to vo hūroñ kā
mere saude se hai baḌh kar ḳhafqān-e-vā.iz

qatl-e-āshiq kā jo hotā hai irāda us ko
pahle dekhe hai ḳhar o gaav pe talvār kā kaaT

ye āshiq falsafī thā is se pahle
ye jaa.ez hai jo is pe ho rahā hai

sair hai jannat kī sairoñ se tire āshiq kā dil
le ke jannat kyā kare bhūkā tire dīdār kā

jannat-e-sūfiyā nisār dahr kī musht-e-ḳhāk par
āshiq-e-arz-e-pāk ko dāvat-e-lā-makāñ na de

maiñ isī dam tirī tarvār se kāTūñgā galā
teġh dikhlā ke miyāñ āshiq-e-jāñ-bāz se ramz

ape hai matlab ape hai tālib ape hai dilkash ape hai āshiq
ape che majnūñ ape che laila ape hai yūsuf ape zuleḳhā

vo ham se pūchhte haiñ tum hamāre āshiq ho
javāb kyā hai ab us ke sivā.e hañs denā

piitā huuñ judā.ī meñ tirī ghūñT lahū kī
sun ġhuncha-dahan āshiq-e-dil-gīr kī āvāz

ho chale ham to naam ke āshiq
naam naqsh-o-nigār hai kyā hai

mujhe ek āshiq-e-ḳhasta kī kahīñ kal jo qabr nazar paḌī
na kisī se koī lagā.e jī ye khudā ba-lauh-e-mazār thā

pesh kar daaġh agar dil pe koī khāyā ho
ishq har āshiq-e-sādiq se nishānī māñge

asar-e-nāla-e-āshiq nahīñ dekhā tum ne
thaam lo dil ko sambhal baiTho ab achchhā dekho

chaar din ārā.ishoñ se haath uThānā chāhiye
sog meñ āshiq ke lāzim haiñ baḌhānī chūḌiyāñ