Tags-Garmi

aab o giyā se be-niyāz sard jabīn-e-koh par
garmī-e-rū-e-yār kā aks bhī rā.egāñ gayā

phir nigāh-e-shauq kī garmī hai aur rū-e-nigār
phir araq-ālūd ik kāfir kī peshānī hai aaj

mujhe ye Dar hai kisī āftāb kī garmī
tirī nazar ke hazār ā.inoñ ko toḌ na de

bahut apne ko shā.ista vo ġhairoñ meñ banāte haiñ
tabī.at meñ jo garmī hai sharārat aa hī jaatī hai

'jigar' hai zindagī jab tak ki garmī hai mohabbat kī
huā jab sard siina to jiye jaane se kyā hāsil

garmī ke zulm se ye
duniyā dahak rahī thī

balbe sharār-e-ashk kī garmī ki ab talak
ik aag lag rahī hai mirī āstīn ko

har baat meñ us kī garmī hai har naaz meñ us ke shoḳhī hai
qāmat hai qayāmat chaal parī chalne meñ phaḌak phir vaisī hī

garmī sī ye garmī hai
maañg rahe haiñ log panāh

garmī meñ tere kūcha-nashīnoñ ke vāste
pañkhe haiñ qudsiyoñ ke paroñ ke bahisht meñ

na kar deñ mujh ko majbūr-e-navā firdaus meñ hūreñ
mirā soz-e-darūñ phir garmi-e-mahfil na ban jaa.e

ka.ī chaTāneñ gudāz jismoñ meñ apnī garmī se Dhal ga.ī thiiñ
butoñ ke qisse meñ tesha-kāroñ kā tazkira bhī kahīñ kahīñ thā

apne lahū kī garmī hī sab kuchh hai dosto
ab jis ke ba.ad kuchh bhī nahīñ uun yā kapās

kabhī bārish kabhī garmī kabhī sardī zarūrī hai
kisī ko 'sād' mausam ek se achchhe nahīñ lagte

sardī-o-garmī-o-barsāt meñ aa jaatā hai
mujh se milne vo mazāfāt meñ aa jaatā hai

garmī sahī kalām meñ lekin na is qadar
kī jis se baat us ne shikāyat zarūr kī

asīrī ne chaman se merī dil-garmī ko dho Daalā
vagarna barq jā kar āshiyāñ merā jalā aave

rukā jaatā hai jī andar hī andar aaj garmī se
balā se chaak hī ho jaave siina Tuk havā aave

tum garm mile ham se na sarmā ke dinoñ meñ
pesh aa.e ba-garmī bhī to garmā ke dinoñ meñ