Tags-Gham

vus.ateñ aur bahut haiñ ġham-e-daurāñ ke liye
qibla-e-jāñ ke liye qibla-numā ḳhuub sahī

baḳhiye kī ab jagah hai na paivand kī jagah
kyā sī rahe haiñ is ko tire ġham-gusār dost

ehtirām-e-ādmī ehsās-e-ġham marg-e-anā
aaj kis kis zaḳhm ko karte rafū maiñ aur tū

hādse to aur bhī 'tasnīm' se uljhe magar
ik tirā ġham thā jo har aalam meñ pā.inda rahā

ek tirā hī dil nahīñ ghāyal dard ke maare aur bhī haiñ
kuchh apnā kuchh duniyā kā ġham dekhne vaale dekhtā jā

qaum ke ġham meñ dinner khāte haiñ hukkām ke saath
rañj leader ko bahut hai magar ārām ke saath

kyuuñ na vahshat meñ chubhe har mū ba-shakl-e-nīsh-tez
ḳhār-e-ġham kī tere dīvāne kī kāvish aur hai

un se kuchh kah na sakā maiñ shab-e-ġham kī bāteñ
go ki bhūlā thā magar yaad bhī thiiñ thoḌī sī

yaad kuchh aa ke ye hālat huī merī ki na pūchh
pichhlī ghaḌiyāñ shab-e-ġham kī jo rahīñ thoḌī sī

vo karam na ho sitam ho koī baat kam se kam ho
ye adā-e-be-niyāzī mire ġham-gusār kyā hai

ye ham ahl-e-ġham kī manzil hai dabe qadam guzar jā
ki ajal yahāñ ke fitnoñ meñ tirā shumār kyā hai

kis tarah mayassar ho mujhe arsa-e-rāhat
har lahza na.ī choT nayā ġham nayā charkā

ma.asūmiyat ne jiinā bhī dushvār kar diyā
nā-karda-kār dil meñ kabhī itne ġham na the

koī ġhazal koī naġhma koī bahār kā giit
fazā-e-ġham ko sunāo ki ḳhvāb larzāñ haiñ

chehroñ ko ye ġham hai koī ā.īna nahīñ hai
ā.īna tarastā hai ki chehra nahīñ koī

rahm ai ġham-e-jānāñ baat aa ga.ī yaañ tak
dasht-e-gardish-e-daurāñ aur mire garebāñ tak

ḳhushī ke lamhe to jūñ-tūñ guzar ga.e haiñ yahāñ par
bas ek sā.at-e-ġham kāTnī muhāl huī hai

ġham-e-zindagī sahī jāñ-gusil magar is se koī bachā bhī hai
yahī ġham hai rāz-e-nashāt-e-dil yahī zindagī kā mazā bhī hai

aa jaa.e tasavvur meñ koī hashr-ba-dāmāñ
phir merī shab-e-ġham ko zarūrat hai sahar kī

jab huā rutba-e-fanā fillāh
ġham nahīñ gar jahān-e-fānī hai