Tags-Gham

kyā kahūñ kyā tarheñ badleñ chaah ne āḳhir ko 'mīr'
thā girah jo dard chhātī meñ so ab ġham ho gayā

le kahīñ duur chal ai ġham-e-dil mujhe
raas aa.ī nahīñ terī mahfil mujhe

parvā-e-karam na shikva-e-ġham
allāh re dimāġh be-dilī kā

mūnis-e-ġham hai hamārā so kahāñ mumkin hai
tujh ko dekheñ to tire hijr ko ruḳhsat kar deñ

tirī aarzū se bhī kyuuñ nahīñ ġham-e-zindagī meñ koī kamī
ye savāl vo hai ki jis kā ab koī ik javāb nahīñ rahā

ġham ke bhī kuchh phuul khile haiñ
zaḳhmoñ se bhī shāḳheñ niklīñ

aaj dīvāngī fuzūñ-tar hai
ye ġham-e-intizār kis kā hai

sauñp kar ḳhāna-e-dil ġham ko kidhar jaate ho
phir na pāoge agar us ne ye ghar chhoḌ diyā

mushkileñ dil meñ na.ī sham.eñ jalā detī haiñ
ġham se bujh jaanā to durveshoñ kā dastūr nahīñ

us kā lutf-e-ḳhās jo ye istitā.at hai nasīb
bār-e-ġham juz ibn-e-ādam kyā uThā paate haiñ log

kar ke sañg-e-ġham-e-hastī ke havāle mujh ko
ā.īna kahtā hai ab dil meñ chhupā le mujh ko

maiñ na dariyā huuñ na sāhil na safīna na bhañvar
dāvar-e-ġham kisī sāñche meñ to Dhāle mujh ko

itnā bharpūr kahāñ thā mire ġham kā iz.hār
ajnabī lagte haiñ ab apne hī naale mujh ko

kyuuñ matā-e-dil ke luT jaane kā koī ġham kare
shahr-e-dillī meñ to aise vāqiye hote rahe

vo zamāne aur the jab terā ġham sahtā thā maiñ
jab tire hoñToñ kī rañgīnī se kuchh kahtā thā maiñ

kar diye sard masarrat kī ghaTā ne jazbāt
ruuh ko ġham kī zarā dhuup dikhāo yaaro

phir dil ne mire ġham aur ḳhushī ko
rassī kī tarah se baT ke dekhā

hameñ bhī pyaar se dekho ki ham haiñ ḳhasta-jigar
ġham-e-zamāna ke maare hue satā.e hue

kabhī jo rahte the sar-mast-e-nashtar-e-ġham-e-dost
vo jā rahe ġham-e-jāñ se muñh kī khaa.e hue

ġham huā merī zindagī kā madār
is qadar ġham kā ehtirām kiyā