Tags-Gham

ta.alluq TūTne ko hai jahāñ se
chalo ki band-e-ġham TuuTe hue haiñ

sab ke nasīb meñ hai kahāñ mauj-e-dard-o-ġham
maḳhsūs haiñ ināyateñ parvardigār kī

dil is qadar gudāz hai barsoñ hī ġham rahe
aañsū jo apne dīda-e-giryāñ se duur hoñ

subuk-ravān-e-rah-e-ġham ne zindagī 'mohsin'
musāfirāna guzārī qayām se pahle

tujh bin na kar sake mai-e-ishrat se halq tar
ḳhūñ-nāb-e-ġham se lab tirā āshiq na ho sake

ham se to rāh-o-rasm hai aġhyār kī tarah
duniyā pe mehrbān haiñ ġham-ḳhvār kī tarah

shab-e-ġham meñ kal maiñ ne taare gine haiñ
zarā aañkh merī lagī ho to jānūñ

ġham-e-hayāt kā jhagḌā miTā rahā hai koī
chale bhī aao ki duniyā se jā rahā hai koī

junūñ kā paas vafā kā ḳhayāl husn kā ġham
ka.ī charāġh jale ek aarzū ke liye

ġham kī saarī chāleñ gahrī bachte bachte āḳhir-kār
dekhā is bechāre dil ne bebas ho kar khaa.ī maat

dhuup meñ ġham kī abas jī kuuñ jalāyā afsos
us ke saa.e meñ amaañ thā mujhe ma.alūm na thā

adab kā ziina milā ziist kā qarīna milā
kahāñ kahāñ na tire ġham se istifāda huā

hameñ to shām-e-ġham meñ kāTnī hai zindagī apnī
jahāñ vo haiñ vahīñ ai chāñd le jā raushnī apnī

dekheñ kis tarah basar hote haiñ ayyām-e-junūñ
yaañ to hai sāmnā har dam inhīñ ġham-ḳhvāroñ se

haath uljhā hai garebāñ meñ khaḌe dekhte haiñ
aur ummīd koī kyā kare ġham-ḳhvāroñ se

kaan meñ pichhle pahar aa.ī ik āvāz-e-hazīñ
ab to ġham-ḳhvār bhī diq haiñ tire bīmāroñ se

diloñ kī barf pighaltī nahīñ hai jis ke baġhair
vo aañch ek ġham-e-be-nishāñ se aatī hai

urdu zabān dil hai ġhazal us kī jaan hai
nau-e-bashar kī mūnis-o-ġham-ḳhvār hai ġhazal

ḳhushī kī rut ho ki ġham kā mausam nazar use DhūñDtī hai har dam
vo bū-e-gul thā ki naġhma-e-jāñ mire to dil meñ utar gayā vo

sūraj tulūa hoñ yā sūraj ġhurūb 'sahbā'
shab-hā-e-ġham ke parde ḳhud par girā chukā huuñ