Tags-Gham

ġham kaahe kā yaaro mātam kyā badloge nizām-e-ālam kyā
marnā thā 'razā' ko martā hai ye kaahe kā ronā dhonā hai

ġham kī tārīk fazāoñ se nikalne na diyā
sham.a raushan jo koī kī bhī to jalne na diyā

mujh ko afsos ki vo aur adū ke bas meñ
us ko ye ġham ki mirā ab koī pursāñ na rahā

marg-e-āshiq kā abas hai sog har dam is qadar
chhuT gayā vo qaid-e-ġham se tum ko fursat ho ga.ī

nahīñ mauqa ye pursish-e-ġham kā
dekhiye dil dukhā huā hai abhī

maiñ chaah kar bhī tire saath rah nahīñ pā.ūñ
tū mere ġham mirī majbūrī par malāl to kar

na ġham karo jo kaḌī dhuup kā safar hai hayāt
jilau meñ apne koī sāya-e-shajar rakkho

tire ishq meñ bhī mazā mile tire hijr meñ bhī mazā mile
rahūñ ġham meñ tere jo mubtalā unhīñ chāhatoñ se navāz de

ranj-o-ġham uThā.e haiñ fikr-o-fan bhī paa.e haiñ
zindagī ko jitnā bhī jī sake jiyā ham ne

mahfil meñ jise ma.alūm nahīñ ehsās kī karvaT kyā shai hai
vo dil kī suunī vaadī meñ ġham kī añgḌā.ī kyā jaane

alam ho rañj ho ġham ho balā ho shādmānī ho
jo tū ne likh diyā ai kātib-e-taqdīr dekheñge

kisht-e-dil fauj-e-ġham ne kī tārāj
tis pe tū māñgne ḳhirāj aayā

mere siine meñ 'munavār' hai usī shoḳh kā ġham
jis ke siine meñ mire ġham kī davā rakkhī hai

raat kī raat Thaharne vaale vaqt-e-ḳhush kī baat samajh
sub.h to ik darvāza-e-ġham par duniyā āñkheñ maltī hai

ġham bahut din muft kī khātā rahā
ab use dil se nikālā chāhiye

tirā ḳhayāl sar-e-shām ġham sañvartā huā
bahut qarīb se guzrā salām kartā huā

ye sher-o-fan ye mai-o-naġhma ye shabāb-o-rabāb
ye baḳhshisheñ haiñ ġham-e-zindagī bhulāne ko

dahan dahan ye udāsī nazar nazar ye malāl
ilāhī kaun sā ġham Das gayā zamāne ko

'jamāl' aur bhī sulgā gayā ye ātish-e-ġham
uThāyā jaam jo dil kī lagī bujhāne ko

donoñ jahāñ kā shādī o ġham dil se bhuul kar
paañv darāz kar ke farāġhat se soiye