Tags-Gham

ishq meñ paḌ ke luT gayā 'rāzī'
un ko ġham hai ki kuchh huā bhī nahīñ

dil hī nahīñ jo soz-e-junūñ se tapāñ nahīñ
kyā zindagī jo vaqf-e-ġham-e-jāvedāñ nahīñ

kahānī kyā sunā.ūñ dil-jaloñ kī ġham ke māroñ kī
ki uThtā chār-sū ik ġham kā tūfāñ dekh letā huuñ

ghaTā.eñ ġham kī sar par chhā ga.iiñ jo hind vāloñ ke
dar-o-dīvār ko bhārat ke giryāñ dekh letā huuñ

us ke jī meñ hai kyā us se pūchho zarā dekheñ kahtā hai kyā
kis ne us shaḳhs par koh-e-ġham Dhā diyā shahr vaalo suno

dil ek aur hazār āzmā.isheñ ġham kī
diyā jalā to thā lekin havā kī zad par thā

har ik azaab ko maiñ sah gayā magar na milā
vo ek ġham jo mire hausle se baḌh kar thā

udaas rastoñ meñ paiham sulagtī sub.hoñ meñ
jo ġham-gusār thā koī to dīda-e-tar thā

ye ek hī ehsān-e-ġham dost hai kyā kam
be-mehri-e-daurāñ kī jafā yaad nahīñ hai

ye kaise baal khole aa.e kyuuñ sūrat banī ġham kī
tumhāre dushmanoñ ko kyā paḌī thī mere mātam kī

vo jo karte the baat baat kā ġham
un ko raas aa gayā hayāt kā ġham

ai shab-e-hijr mere siine par
tū ne rakkhā hai kā.enāt kā ġham

tū bhī sūraj hai apnī hastī kā
tujh ko ma.alūm kyā ho raat kā ġham

chal ġham-e-dil ġham-e-jahān liye
bhuul jaa.eñ ta.alluqāt kā ġham

aaj fursat milī thī bāhar se
khā gayā andarūn-e-zāt kā ġham

vo payambar haiñ apnī rātoñ ke
jin pe utrā hai chāñd-rāt kā ġham

aa gayā yaad unheñ apne kisī ġham kā hisāb
hañsne vāloñ ne mire ashk jo gin ke dekhe

arsa-e-hijr-e-yār meñ 'irfāñ'
dard kī ġham-gusāriyāñ tauba

mirā qadam hī nahīñ hijr meñ bagūla-sifat
bichhaḌ ke mujh se tirā ġham bhī dar-ba-dar hai bahut

na ḳhalvat-e-ġham-e-duniyā na bazm-e-jāñ 'tausīf'
tumhāre vāste ik bekasī kā ghar hai bahut