Tags-Gham

hai bad balā kisī ko ġham-e-jāvedāñ na ho
yā ham na hoñ jahāñ meñ ḳhudā yā jahāñ na ho

saarā ġham merī hī qismat meñ likhā hai 'saifī'
dil mirā 'mīr' kā dīvān huā jaatā hai

saḳhtī-e-ġham señ mire dil kā lahū paanī ho
hashm-e-giryāñ satī jaarī hai ḳhudā ḳhair kare

hijr ġham kā bayān hai goyā
yaas kī dāstān hai goyā

hijr meñ ġham-gusār mahram-e-rāz
dard-o-ġham ke sivā nahīñ hotā

tark-e-ta.alluqāt nahīñ chāhtā thā maiñ
ġham se tire najāt nahīñ chāhtā thā maiñ

qissa tabāhiyoñ kā sunāyā na jā.egā
dil meñ jo ġham chhupā hai batāyā na jā.egā

tū aag meñ ai aurat zinda bhī jalī barsoñ
sāñche meñ har ik ġham ke chup-chāp Dhalī barsoñ

hai mayassar aaj jānāñ kar lo apne ġham ġhalat
kal ko 'zākir' bhī purānī ik ḳhabar ho jā.egā

vo le ga.e haiñ chāñd-sitāroñ kī raushnī
kahte rahe fasāna-e-ġham āsmāñ se ham

ye baat agar hai sach ki palaTtā nahīñ hai vaqt
lamhāt-e-ġham mire liye kyuuñ kar palaT kar aa.e

ġham na kar ḳhushiyāñ na ā.eñgī to ġham aa jā.eñge
bas hī jā.egī kisī se dil kī bastī ek din

tirī chashm-e-tar meñ ravāñ-davāñ ġham-e-ishq kā jo malāl hai
ye hī ibtidā-e-firāq hai ye hī intihā-e-visāl hai

mirī hālatoñ meñ nihāñ haiñ ab tirī justujū kī ḳharābiyāñ
na maiñ ġham-zada na maiñ shādmāñ mirā haal bhī koī haal hai

zamāna be-karāñ thā be-karāñ ham ne nahīñ rakkhā
tire ġham se varā koī jahāñ ham ne nahīñ rakkhā

hamārā har suḳhan sīdhā utartā hai dil-o-jāñ meñ
koī bhī ḳhanjar-e-ġham nā-tavāñ ham ne nahīñ rakkhā

har dil ko lubhātā hai ġham terī mohabbat kā
terī hī tarah zālim dilkash hai tirā ġham bhī

hujūm-e-ġham sambhaltā hī nahīñ ai 'sham.a' ab mujh se
kabhī to kaash aisā ho mujhe tanhā kare koī

ḳhayāl ko zau nazar ko tābish nafas ko raḳhshandagī milegī
bhaḌak uThā soz-e-ġham jo dil meñ to har kahīñ raushnī milegī

ġham-o-musarrat mileñge bāham to zindagī bhī chamak uThegī
ye rū hai manfī ye rū hai musbat milegī ye raushnī milegī