Tags-Gham

talab ke mausam gañvā.e maiñ ne kamāl-e-ġham se dhuāñ dhuāñ tum
shikāyateñ ye kaḌe mahāzoñ se lauT aane ke baad hoñgī

din chhupā aur ġham ke saa.e Dhale
aarzū ke na.e charāġh jale

na koī rāhguzar hai na koī vīrāna
ġham-e-hayāt meñ sab kuchh luTā ke baiThe haiñ

jo ġham mujhe haiñ aap unheñ ai janāb-e-'nūh'
kyā jāniye dil us ko diyā ho to jāniye

ġhamgīñ haiñ jis ke ġham se vāqif nahīñ vo ham se
yārab phir is alam se ho sabr-o-tāb kyuuñ kar

tap-e-darūñ ġham-e-furqat varam-e-payāda-ravī
maraz to itne haiñ aur kuchh davā nahīñ rakhte

ġham se ehsās kā ā.īna jilā paatā hai
aur ġham sīkhe hai aa kar ye salīqa mujh se

fazā meñ guuñj rahī haiñ kahāniyāñ ġham kī
hamīñ ko hausla-e-sharh-e-dāstāñ na rahā

tirā ġham kyā hai bas ye jāntā huuñ
ki merī zindagī mujh se ḳhafā hai

kabhī taḌpā gayā hai dil tirā ġham
kabhī dil ko sahārā de gayā hai

mohabbat meñ 'firāq' itnā na ġham kar
zamāne meñ yahī hotā rahā hai

shām-e-ġham kuchh us nigāh-e-nāz kī bāteñ karo
be-ḳhudī baḌhtī chalī hai raaz kī bāteñ karo

nik.hat-e-zulf-e-pareshāñ dāstān-e-shām-e-ġham
sub.h hone tak isī andāz kī bāteñ karo

ab na payām-e-vasl de hijr kā kaun ġham sahe
duur ho duur ho are paas na aa tū kaun hai

ġham-hā-e-mohabbat kā asar dekh rahā huuñ
bikhre hue dāman pe guhar dekh rahā huuñ

vo aañkh mere liye nam hai kyā kiyā jaa.e
use bhī aaj mirā ġham hai kyā kiyā jaa.e

vo mujh se milne ko aa.e haiñ merī maut ke ba.ad
ḳhushī bhī mere liye ġham hai kyā kiyā jaa.e

kyā ġham jo hasratoñ ke diye bujh ga.e tamām
dāġhoñ se aaj ghar meñ charāġhāñ kareñge ham

dekh kar un ke lab pe ḳhanda-e-nūr
niiñd sī ġham ko aa.ī jaatī hai

ġham-e-ulfat ke kār-ḳhāne meñ
zindagī jagmagā.ī jaatī hai