Tags-Gham

baazī hai jaan hijr hai haar aur visāl jiit
ġham hai bisāt-e-dil kuuñ mire nard boliye

daulat-e-ġham bhī ḳhas-o-ḳhāk-e-zamān meñ ga.ī
tum ga.e ho to mah o saal kahāñ Thahre haiñ

kashākash-e-ġham-e-hastī mujhe ijāzat de
kuñvāre-pan kī hathelī pe terā naam likhūñ

tarab-ḳhānoñ ke naġhme ġham-kadoñ ko bhā nahīñ sakte
ham apne jaam meñ apnā lahū chhalkā nahīñ sakte

chāhā thā ġharaz maiñ ne ishq aise hī dilbar kā
gar mujh pe bahut guzrā ġham is meñ to kam guzrā

sham-e-ummīd gar nahīñ hotī
shām-e-ġham kī sahar nahīñ hotī

afsurda dil thā ab to huā ġham se murda-dil
jiitā huuñ dekhne meñ vale mujh meñ jaañ nahīñ

ġham-e-hijr ke ga.e din guzar huā āḳhir apnā visāl hī
pa ye kyā ġhazab hai pa.e-ḳhudā tujhe aaj tak hai malāl hī

talāsh-e-kaun-o-makāñ hai na lā-makāñ kī talāsh
ye zindagī hai ġham-e-ishq-e-jāvedāñ kī talāsh

kisī ko manzil-e-ishrat kā ġham hai aur mujhe
huī hai manzil-e-ishrat pe kārvāñ kī talāsh

ye ḳhvāb hai ki hai tābīr-e-ḳhvāb ai ġham-e-dil
har ik qadam hai yahāñ umr-e-rā.egāñ kī talāsh

jo ho sake to mirā ġham hī jāvedāñ ho jaa.e
'jamāl' mujh ko nahīñ aish-e-jāvedāñ kī talāsh

kahāñ kā shaġhl ab to daur hai ḳhūñ-nāba-e-ġham kā
vahī qismat meñ thī jo pī chuke aglī bahāroñ meñ

kaifiyat koī mile ham ne sambhālī aise
ġham kabhī ġham se bhī mudġham nahīñ hone paatā

bahātā huuñ kabhī aañsū kabhī phirtā huuñ maiñ vāpas
mohabbat kī ḳhalish aisā shab-e-ġham meñ satātī hai

sannāTā chhā gayā hai shab-e-ġham kī chaap par
sūraj ko thā yaqīn bahut apne-āp par

kisī kī chaah meñ ġham kyā hai aur ḳhushī kyā hai
tujhe ḳhabar nahīñ mafhūm-e-āshiqī kyā hai

rahe jo dil se lipaT kar vo ġham hī behtar hai
jo chand lamhoñ kī mehmāñ hai vo ḳhushī kyā hai

maiñ kisī ke ashk pochhūñ to vo ġham-gusār merā
ye samajh ke dard Dhoyā maiñ ne baar baar ab tak

maiñ kise kahūñ ai 'bāliġh' mirā ġham-navāz tū hai
mirī bekasī kā kis ko huā e'tibār ab tak