Tags-Gham

kaT ke rah jā.egī āḳhir qismat-e-ġham kī lakīr
tere zindānī agar zanjīr ḳhaḌkāne lage

kahāñ mumkin hai poshīda ġham-e-dil kā asar honā
laboñ kā ḳhushk ho jaanā bhī hai āñkhoñ kā tar honā

koī hai jo ġham nahīñ jheltā kise har nafas meñ sukūn hai
tire chāra-gar ko ḳhabar nahīñ tire apne bas meñ sukūn hai

mire rāste baḌe narm-ḳhū vo shumāl ho ki junūb ho
mire qulzum-e-ġham-e-jāvedāñ tire niile ras meñ sukūn hai

jāñ-sapārī daaġh katthā chūnā hai chashm-e-intizār
vāste mehmān ġham ke dil hai biiḌā paan kā

ye hālat hai ki kuchh pā kar ḳhushī dil ko nahīñ hotī
agar kuchh kho bhī jaatā hai to us kā ġham nahīñ hotā

gulshan pe hai ḳhizāñ kā tasallut to ġham nahīñ
dil meñ fareb-e-husn-e-bahārāñ sajā ke lā

hai tere ġham kī ġham-e-rozgār se sāzish
kahāñ kahāñ dil-e-dīvāna kaam aatā hai

kyā bebasī hai ye ki tire ġham ke saath saath
maiñ apne dil meñ huuñ ġham-e-daurāñ liye hue

furqat tirī to ek bahāna thī varna dost
dil yuuñ bhī hai mirā ġham-e-pinhāñ liye hue

miTā do mirā naqsh-e-hastī nahīñ ġham
mirī zindagī ke nishāñ aur bhī haiñ

umr dukh dard meñ kaTī apnī
is liye ġham se pyaar kartā huuñ

ġham kī be-panāhī meñ dil ne hausla paayā
tīrgī ke jañgal meñ chashma-e-ziyā paayā

usī dard-āshnā dil kī taraf-dārī meñ rahte haiñ
ham apne-āp meñ gum apnī ġham-ḳhvārī meñ rahte haiñ

tarāna-e-ġham-e-pinhāñ hai har ḳhushī apnī
ki ek dard-e-musalsal hai zindagī apnī

muttasil tū jo mirā ḳhūn-e-jigar piitā hai
kyuuñ ġham-e-ishq ye kyā tujh ko mazedār lagā

ik jaan hai vo ḳhair se vārafta-e-ġham hai
ik dil hai so hai soḳhta-sāmān-e-tamannā

be-sabab hī nahīñ murjhā.e the jazboñ ke gulāb
tū ne chhū kar ġham-e-hastī ko nikhārā thā kahāñ

āñdhiyāñ ġham kī chalīñ aur karb-bādal chhā ga.e
tujh se kaise ho milan sab rāste dhundlā ga.e