Tags-Gham

dil meñ itnī bas chukī hai un kī yaad
vo bhulā bhī deñ to koī ġham nahīñ

ham se pūchho zabt-e-ġham kī lazzateñ
rone vāloñ ko shu.ūr-e-ġham nahīñ

apne apne ġham meñ hai har aadmī
aadmī ko aadmī kā ġham nahīñ

ġham hai is duniyā meñ jān-e-zindagī
zindagī meñ ġham na ho to ham nahīñ

aah anjām-e-ġham-e-dil ai 'shamīm'
ro rahā huuñ aur āñkheñ nam nahīñ

ġham vasl meñ hai hijr kā hijrāñ meñ vasl kā
hargiz kisī tarah mujhe ārām hī nahīñ

yaaro jo hogā dekheñge ġham se to ho najāt
le kar ḳhudā kā naam chalo mai-kade chaleñ

tañg aa ke mohabbat tark na kī ham garche rahe nākām sadā
sarshār the lazzāt-e-hasrat-o-ġham se hote bhalā bezār to kyā

ḳhū-e-ġham dil ko hai ya.anī his-e-ġham kuchh bhī nahīñ
kyā hai ab kār-gah-e-nāz-o-sitam kuchh bhī nahīñ

roz-e-fariyād se maġhlūb nahīñ tāqat-e-shukr
jabr-e-taqdīr-e-girāñ bārī-e-ġham kuchh bhī nahīñ

zindagī muzda-e-ġham maut naved-e-ġham-e-nau
koī rūdād ba-har-shān-e-karam kuchh bhī nahīñ

darḳhur-e-be-ḳhudī-e-dil na alam hai na surūr
zahr-e-ġham kuchh bhī nahīñ sāġhar-e-jam kuchh bhī nahīñ

farq-e-zarf-e-dil-o-paimāna-e-taqdīr na pūchh
us ne bharpūr diyā aur use ġham kuchh bhī nahīñ

kiyā hai kaam baḌā zindagī meñ ashkoñ ne
diye jalā.e shab-e-ġham meñ raushnī ke liye

har marhala-e-ġham meñ milī is se tasallī
har moḌ pe ghabrā ke tirā naam liyā hai

ghar hai tārīk yūrish-e-ġham se
aaj ik ātishīñ tarāna chheḌ

aaj har shai se bad-gumāñ haiñ ham
mat hameñ ai ġham-e-zamāna chheḌ

ai ġham-e-yār ham haiñ ḳhākistar
aur mat ai rafīq-e-ḳhāna chheḌ

'rashīd' lab pe hañsī hai to aañkh nam kar le
na.ī ḳhushī ke muqābil purānā ġham bhī to ho

chal basā āḳhirash marīz-e-ġham
hāsil-e-sa.ī-e-chāragar dekhā