Tags-Gham

baḌh ke aa.e the ka.ī ġham pa.e taskīñ lekin
ġham-e-daurāñ ke muqābil koī Thahrā bhī nahīñ

har nazar sat.h-e-tabassum pe Thahar jaatī hai
kyā zamāne meñ koī ġham kā shanāsā bhī nahīñ

zindagī ko na.e ḳhvāboñ se sajā kar laao
ye tabassum to mire ġham kā mudāvā bhī nahīñ

hādse ho chuke 'arshad' ġham-e-ulfat ke tamām
ab to shāyad dil-e-māyūs taḌaptā bhī nahīñ

ġham-o-alam ranj-o-yās-o-hasrat uThā.ūñgā sab ke ruḳh se parde
tumheñ qasam hai dil hazīñ kī uThāo to tum naqāb pahle

ruḳhsat-e-nāla mujhe de ki mabādā zālim
tere chehre se ho zāhir ġham-e-pinhāñ merā

mujh ko har ek baat kā ġham hai
maiñ huuñ har ek baat meñ tanhā

ġham-e-vajūd kā mātam karūñ to kaise jiyūñ
magar ḳhudā tire dāman pe daaġh hai ki nahīñ

intiqām-e-ġham-o-alam leñge
zindagī ko badal ke dam leñge

ḳhud jo ġham haiñ to aa.ina hairāñ
kis ġhazab kā siñghār kar baiThe

mirī jaañ par ye patthar is liye bhārī ziyāda hai
mohabbat kam tire lahje meñ ġham-ḳhvārī ziyāda hai

koī bhī ġham ho ġham-e-dil ki ġham-e-dahr 'hafīz'
ham ba-har-hāl ba-har-rañg ġhazal-ḳhvāñ hoñge

aañsū pahlī shart hai is samjhaute kī
ġham to sāñsoñ kā jurmāna hotā hai

yās-o-ġham rañj-o-alam ne kar liyā hai dil meñ ghar
ai ḳhushī-e-vasl-e-jānāñ aa.e din bhī phuuT kar

kuchh bhī vaqfa ho to gulshan se le aa.eñ sayyād
rah gayā hai dil-e-ġham-kash gul o raihāñ meñ phañsā

bahr-e-ġham bhī hai kabhī āshiq ḳhasta ke liye
hai kabhī sāhil-e-ishrat bhī tumhārā chehra

zahrāb-e-ġham kā koī asar ho to kis tarah
siine meñ dil hai dil bhī lahū meñ bujhā huā

jo ḳhush haiñ vo ḳhushī meñ kaaTe haiñ raat saarī
jo ġham meñ haiñ unhoñ par guzre hai raat bhārī

jab koyal apnī un ko āvāz hai sunātī
sunte hī ġham ko maare chhātī hai umñDī aatī

kitnoñ ne apnī ġham se ab hai ye gat banā.ī
maile kuchaile kapḌe āñkheñ bhī DabDabā.ī