Tags-Gham

mirī har ḳhushī ḳhushī thī tirī har ḳhushī se pahle
mujhe koī ġham nahīñ thā ġham-e-āshiqī se pahle

koī kashmakash nahīñ thī ġham-e-dushmanī se pahle
mujhe ḳhauf hī kahāñ thā tirī dostī se pahle

rāh-e-vafā meñ koī detā hai saath kis kā
ġham kyuuñ manā.eñ nāhaq ham apnī bekasī par

ġham-o-ḳhushī bhī to ik nasha hai sambhalnā āsāñ nahīñ hai 'ḳhālid'
binā piye bhī qadam hamāre jo aaj bahke to log samjhe

khīñch lī kis ne tanāb-e-ḳhema-e-sidq-o-safā
kaun hai is dasht-e-ġham meñ be-hunar hotā huā

chhoTī-moTī baat ho to jins-e-ġham dete raho
jurm ho sañgīn to ḳhushiyoñ kā jurmāna karo

dāl-roTī kā baḌā fikr thā ye bhī chhūTā
ho ga.ī jab ki ye aadat hameñ ġham khāne kī

kyā haal ho kyā jaane shab-e-ġham kī sahar kā
betābī-e-dil aaj sar-e-shām bahut hai

palkoñ pe ab nahīñ hai vo pahlā sā bār-e-ġham
rone ke ba.ad kuchh hameñ ārām bhī to hai

ġham-e-ma.āl ġham-e-zindagī ġham-e-daurāñ
hamāre ishq kā charchā kahāñ kahāñ na rahā

kyā nahīñ tāzīr miltī hai gunāh-e-ishq kī
ātish-e-furqat jahannam hai dil-e-ġhamnāk ko

tārīf ġham-e-hijr kī kyā mujh se bayāñ ho
ik zahr hai jo qalb o jigar kaaT rahā hai

ġham nahīñ jo luT ga.e ham aa ke manzil ke qarīb
jaane kitnī kashtiyāñ Duubī haiñ sāhil ke qarīb

na kaan rakh ke kisī ne sunī hazār afsos
tamām umr rahī ġham kī dāstāñ muñh meñ

lazzat-e-ġham kā ye taqāzā hai
muddat-e-ġham darāz ho jaa.e

uThā le haath mire chāragar ki is dil meñ
salīb-e-hasrat-e-ġham mustaqil gaḌī huī hai

kabhī ye ġham ki adhūrā rahā hamārā kaam
kabhī ye soch ki jitnā kiyā fuzūl kiyā

dīda-e-shauq meñ hai raqs-kunāñ aaj kī raat
ġham kī bujhtī huī sham.oñ kā dhuāñ aaj kī raat

chāñdnī raat ke chehre pe hai kyuuñ ġham kā ġhubār
dhundlī dhundlī sī hai kyuuñ kāhkashāñ aaj kī raat

ramz-o-īmā-o-kinā.e tujhe sab yaad haiñ yaar
ham to bhūle haiñ ġham-e-ġhamza-e-ġhammāz se ramz