Tags-Gham

kahne se huā gahrā kuchh aur ġham-e-pinhāñ
maiñ saa.e se kahtā huuñ hamdam se nahīñ kahtā

dil ko nashāt-e-ġham se huuñ shādāñ kiye hue
mujh par firāq-e-yād hai ehsāñ kiye hue

shāhid haiñ soz-e-qalb ke qatrāt ashk-e-ġham
palkoñ pe haiñ charāġh-e-farozāñ kiye hue

na pūchh us kī dil-afsurdagī kī kaifiyyat
jo ġham-nasīb ḳhushī meñ bhī muskurā na sakā

chashm-e-sāqī ne bhī ye mashvara-e-nek diyā
ki ilāj-e-ġham-e-dil talḳhī-e-bad-nām se hai

ik ham hī nahīñ shākī-e-ālam use kahnā
ab ahl-e-tarab ko bhī hai ye ġham use kahnā

mauj-dar-mauj tire ġham kī shafaq khiltī hai
mujh ko is silsila-e-rañg pe qaabū bhī nahīñ

ye tafā.ut-e-sanam-o-haram hai tabhī ki jab bhī nasha ho kam
jo bhī ġharq-e-bāda-e-haq huā ġham-e-īn-o-āñ se guzar gayā

ġham se ghabrā ke qayāmat kā talabgār na ban
itnā māyūs-e-karam ai dil-e-bīmār na ban

hai rihā.ī kī tamannā to girā de dīvār
qaid-e-zindāñ meñ rahīn-e-ġham-e-dīvār na ban

parda-e-ġham jise samjhā thā vahī ḳhāmoshī
kal tirī bazm meñ mauzū-e-hakāyāt huī

kitnā gahrā lagtā hai ġham kā sāġhar
ashk bahā luuñ to uthlā ho jaatā hai

kījiye bayāñ surūr-e-tap-e-ġham kahāñ talak
har mū mire badan pe zabān-e-sipās hai

kyā ġham hai us ko jis kā 'alī' sā imaam ho
itnā bhī ai falak-zada kyuuñ bad-havās hai

chāñd ubhrā na mire jism se saayā niklā
shām-e-ġham aa.ī to maiñ ghar se akelā niklā

nahīñ ghaTtī mirī āñkhoñ meñ tārīkī shab-e-ġham kī
ye taare raushnī apnī abas barbād karte haiñ

tire qarīb pahuñch kar bhī kam nahīñ hote
ġham-e-hayāt ne jo fāsle baḌhā.e haiñ

musāfirān-e-shab-e-ġham kī raah meñ 'jāmī'
na.e charāġh mirī fikr ne jalā.e haiñ

qaid hai biite vo lamhe yādoñ ke andāz meñ
roz un se tazkira ġham kā sahārā ban gayā

zindagī raazī nahīñ thī ġham uThāne ke liye
ham chale aa.e yahāñ tak muskurāne ke liye