Tags-Gham

mujhe yaqīn dilā hālat-e-gumāñ se nikāl
ġham-e-hayāt ko baḌhte hue ziyāñ se nikāl

sā.at-e-shām-e-ġham-e-hijr kā sannāTā hai
shahr-e-auhām ko sapnoñ se sajāyā jaa.e

kyuuñ ai ġham-e-firāq ye kyā baat ho ga.ī
ham intizār-e-sub.h meñ the raat ho ga.ī

kabhī to soch tujhe kitnā sochtā hogā
vo ġham-zada jo tirī samt dekhtā bhī nahīñ

shab-e-ġham kī ye rāgnī ban meñ
bāñsurī jaisī taal rakhtī hai

ġham-e-be-chehragī kā aks thā jis ne vajūd-e-sañg ko mab.hūt kar Daalā
tarāshīñ silvaTeñ jūñhī ḳhad-o-ḳhāl-e-tahayyur aa ga.e tashkīl kī zad meñ

ummīd kījiye agar ummīd kuchh nahīñ
ġham khā.iye bahut jo ḳhayāl-e-surūr hai

bas ġham-e-jānāñ nahīñ lekin ġham-e-duniyā to hai
aap kaise ho ga.e phir dil-figāroñ se judā

nek guzre mirī shab sidq-e-badan se tere
ġham nahīñ rābta-e-sub.h jo kāzib Thahre

ain mumkin thā chhalak jaate hamāre aañsū
sā.at-e-ġham baḌī tarkīb se Taalī ga.ī hai

'nūrī' hameñ jahāñ meñ masarrat kī thī talāsh
āḳhir har ek shaḳhs ke ġham-ḳhvār ho ga.e

ġham azīzoñ kā hasīnoñ kī judā.ī dekhī
dekheñ dikhlā.e abhī gardish-e-daurāñ kyā kyā

'barq'-e-ġham-dīda tirā mustahiq-e-lutf huā
sunte haiñ arsh ko jā letī hai aahe gaahe

zabt-e-ġham kī sarhadoñ ko ham ne 'hairat' chhū liyā
ġham hoñ chāhe kitne āñkhoñ meñ namī hotī nahīñ

iz.hār-e-ġham-e-dil karnā to 'ehsās' ba-har-hāl āsāñ hai
ashkoñ kī faqat do būñdoñ kā āñkhoñ se nikalnā mushkil kyā

chiir kar siine ko rakh de gar na paa.e ġham-gusār
dil kī bāteñ dil hī se koī bayāñ kab tak kare

mubtalā-e-dard hone kī ye lazzat dekhiye
qissa-e-ġham ho kisī kā dil mirā dhak dhak kare

kyā kyā aziiz dost mile 'mīr' ḳhaak meñ
nādān yaañ kaso kā kaso ko bhī ġham huā

ye kaun sāvanoñ meñ ḳhvāb dekhtā hai dhuup ke
ye kis ne e'tibār-e-ġham pas-e-gumān kho diyā

le kar koī paiġhām kabūtar nahīñ aate
ab ġham bhī tirā ruup badal kar nahīñ aate