Tags-Gham

pūchho zarā ye kaun sī duniyā se aa.e haiñ
kuchh log kah rahe haiñ hameñ koī ġham nahīñ

sard aahoñ se phuñkā jaatā hai siine meñ jigar
ātish-e-ġham tez hotī hai havā ke saath saath

hāsil-e-ġham yahī samajhte haiñ
maut ko zindagī samajhte haiñ

hai mire gird mirī maañ kī duāoñ kā hisār
ġham nahīñ hai koī dushman jo mirī ghaat meñ hai

kaun tumhārā dard baTā.e kis ko itnī fursat hai
naam 'rashīd' tum apnā likh lo ḳhud apne ġham-ḳhvāroñ meñ

ġham ke pahāḌoñ kuuñ sar par uThā.e haiñ vahshat ke panjoñ siiñ aahoñ ne merī
dil ke akhāḌe meñ ab kaun ham-sar hai un pahalvānoñ ke zoroñ kī mānind

koh-e-ġham ham ne bhī o ġhairat-e-shīrīñ kaaTā
josh-e-ulfat meñ tire pesha-e-farhād kiyā

ham gunahgār sahī phir bhī tire bande haiñ
har shab-e-ġham meñ ḳhudā terī sanā ham se huī

haañ pukārā hai ġham-e-zīst ne yuuñ bhī ham ko
pyaar meñ Duubī huī terī sadā ho jaise

ye kaise ġham nikhārā jā rahā hai
faqat ab din guzārā jā rahā hai

ġharq-e-ġham huuñ tirī ḳhushī ke liye
yahī sajda hai bandagī ke liye

har kisī ke liye ġham-e-ishrat
ishrat-e-ġham kisī kisī ke liye

ye jahāñ ġham-kada sahī lekin
ik tamāshā hai ajnabī ke liye

jaane kis kī bad-nazar ne hashr barpā kar diyā
mūnis-o-ġham-ḳhvār sab dushman meñ gardāne ga.e

ashk se mahrūm thiiñ āñkheñ fazā-e-shahr kī
jān-o-dil patthar ke the jo ġham mile patthar ke the

ghar apnā ġham-o-dard samjhe haiñ dil ko
bane mezbāñ mehmāñ kaise kaise

itnā na hue hote ham afsurda vatan meñ
hijrat meñ tirī yaad ġham-añgez bahut hai

ulfatoñ kā ḳhudā nahīñ huuñ maiñ
ranj-o-ġham se judā nahīñ huuñ maiñ

ġham nahīñ mujh ko jo vaqt-e-imtihāñ maarā gayā
ḳhush huuñ tere haath se ai jān-e-jāñ maarā gayā

zamāna saath chalā hai to saath ġham bhī chale
hayāt-o-maut ke rishta meñ ek aur girah