Tags-Gham

aur bhī kitne tarīqe haiñ bayān-e-ġham ke
muskurātī huī āñkhoñ ko to pur-nam na karo

nazar aatā na thā jo gard-e-afkār-o-havādis meñ
vo sāhil aañkh ne tūfān-e-ġham meñ Duub kar dekhā

us kī āñkheñ bhī hasīñ aañkh meñ aañsū bhī hasīñ
ġham meñ Duubā huā chehra bhī ġhazal jaisā thā

ahl-e-ġham tum ko mubārak ye fanā āmādgī
lekin īsār-e-mohabbat jaan de denā nahīñ

masrūr ho rahe haiñ ġham-e-āshiqī se ham
kyuuñ tañg hoñge kashmakash-e-zindagī se ham

aaj yuuñ mauj-dar-mauj ġham tham gayā is tarah ġham-zadoñ ko qarār aa gayā
jaise ḳhush-bū-e-zulf-e-bahār aa ga.ī jaise paiġhām-e-dīdār-e-yār aa gayā

sahrā jo mauj-e-reg huā kuchh bhī ġham nahīñ
dariyā meñ bhī tumhāre qadam ke nishāñ haiñ aur

jo jī rahe haiñ unhī ke liye har ik ġham hai
zahe-nasīb ki phūloñ kī zindagī kam hai

tū chalā gayā hai to shahr phir vahī dasht-e-ġham hai mire liye
vahī maiñ huuñ aur mirī zindagī mire āñsuoñ meñ bharī huī

sūjhtī thī koh-o-sahrā meñ yahī har dam mujhe
kījiye ġham qais kā aur roiye farhād ko

is kasrat-e-ġham par bhī mujhe hasrat-e-ġham hai
jo bhar ke chhalak jaa.e vo paimāna nahīñ huuñ

rūdād-e-ġham-e-ishq hai taaza mire dam se
unvān-e-har-afasānā huuñ afsāna nahīñ huuñ

baḌā vīrān mausam hai kabhī milne chale aao
har ik jānib tirā ġham hai kabhī milne chale aao

kisī tarah shab-e-ġham kī sahar nahīñ hotī
ḳhudā hī jaane ki Duubā hai āftāb kahāñ

ham āvāra gaañv gaañv bastī bastī phirne vaale
ham se priit baḌhā kar koī muft meñ kyuuñ ġham ko apnā le

nazar milāte hī ġham ho ga.e havās 'nazar'
ḳhumār aañkh se chhalkī sharāb meñ dekhā

do qadam hai shab-e-ġham se shab-e-vāda ai dil
chand aahoñ ke sivā raah meñ paḌtā kyā hai

mire ġham kī unheñ kis ne ḳhabar kī
ga.ī kyuuñ ghar se bāhar baat ghar kī

mujh se milne ko sharīf insān aa sakte nahīñ
bār-e-ġham yārān-e-derīna uThā sakte nahīñ

mulk kā ġham hai na ham ko millat-e-baizā kā ġham
''barq se karte haiñ raushan sham-e-mātam-ḳhāna ham''