Tags-Gham

umr-bhar ishq ko ġham-dīda na rakkhe kyūñkar
hādisa vo ki abhī kal hī huā ho jaise

ġham ke tūfānoñ kī zad par be-ḳhatar
phir 'jamālī' ne jalā.e haiñ diye

dard kī dhuup Dhale ġham ke zamāne jaa.eñ
dekhiye ruuh se kab daaġh purāne jaa.eñ

aish mujh tak to pahuñche tab jo Tale
fauj-e-ġham ās-pās se mere

ajal bhī Tal ga.ī dekhī ga.ī hālat na āñkhoñ se
shab-e-ġham meñ musībat sī musībat ham ne jhelī hai

maiñ muskurātā magar dī na ashk ne mohlat
ḳhushī jab ek milī saath ġham hazār mile

ham ye to nahīñ kahte ki ġham kah nahīñ sakte
par jo sabab-e-ġhum hai vo ham kah nahīñ sakte

mujhe jaane vaale kā ġham to nahīñ hai
ki jaanā muqaddar hai

junūñ meñ der se ḳhud ko pukārtā huuñ maiñ
jo ġham hai dāman-e-sahrā meñ vo sadā huuñ maiñ

ġham se ham bhānmatī ban ke jahāñ baiThe the
ittifāqan kahīñ vo shoḳh bhī vaañ aa niklā

ziist ke dard kā ehsās kabhī miT na sakā
sin ḳhushī ke bhī kaTe ik ġham-e-be-nām ke saath

kuchh duur hujūm-e-ġham-e-jānāñ se nikal jā
ai ashk-e-ravāñ sho.ala-e-jāñ barq-e-tapāñ aur

tujh ko ġham-e-jānāñ ġham-e-daurāñ se badal duuñ
hai azm-e-javāñ aur zamāñ aur samāñ aur

ashk-e-ġham tham ga.e yaad aate hī un kī sūrat
jab chaḌhā chāñd to phir nuur sitāroñ meñ na thā

'hosh' karte na agar zabt-e-fuġhāñ kyā karte
pursish-e-ġham kā salīqa bhī to yāroñ meñ na thā

na maltā ḳhaak meñ us gul ke ġham kā ashk agar merā
kasī bulbul ke shāyad aab aur daane ke kaam aatā

dāman-o-jeb-o-garebāñ kā nahīñ koī malāl
ġham ye hai dast-e-junūñ kal ke liye kaam nahīñ

taaza o ġhamnāk rakhte aas aur ummīd kī sab koñpaloñ ko
aur phir hamrāhī-e-bād-e-shabāna ke liye mahtāb hote

kaun sā ġham hai jis kā mudāvā nahīñ kaun sā dard hai jis kā chārā nahīñ
ishq ko ġham ho pyārā to kyā kījiye dard hī dil ko bhaa.e to maiñ kyā karūñ

maiñ to qaa.em huuñ tire ġham kī badaulat varna
yuuñ bikhar jā.ūñ ki ḳhud haath na aa.uuñ apne