Tags-Gham

vo nigāheñ ajab andāz se haiñ ishva-farosh
ġham-e-pinhāñ ko hamāre kahīñ rusvā na kareñ

aah ye rūdād-e-hañgām-e-tarab ai ġham-gusār
zikr-e-gulshan jaise ik be-bāl-o-par ke sāmne

shikāyat-e-ġham-e-dil ko zabāñ nahīñ khultī
ki is nigāh ke andāz haiñ karīmāna

guzārnī hai shab-e-ġham kisī tarah ai dost
na apnī koī kahānī na koī afsāna

ek-ādh harīf-e-ġham-e-duniyā bhī nahīñ thā
arbāb-e-vafā meñ koī itnā bhī nahīñ thā

ġham-e-hastī kā bhī kuchh to mudāvā DhūñDhnā hogā
ġham-e-hastī miTā.eñge bhalā jām-o-subū kab tak

ik ma.asūm se pyaar kā tohfa ghar ke āñgan meñ paayā thā
us ko ġham ke pāgal-pan meñ koThe koThe baañT diyā hai

nazm ġhazal afsāna giit ik tarah hī ġham thā jis ko ham ne
kaisā kaisā naam diyā hai kaise kaise baañT liyā hai

na ġham-e-dil na fikr-e-jāñ hai yaad
ek terī hī bar zabāñ hai yaad

maiñ ġham ko khel samajhtā rahā huuñ bachpan se
bharam ye aaj bhī rakh lenā chashm-e-tar merā

jiine kā lutf kuchh to uThāo nashe meñ aao
hañste haiñ kaise ġham meñ dikhāo nashe meñ aao

maiñ sukūñ huuñ ḳhushī bhī huuñ 'sarhad'
kaun kahtā hai ġham-zada huuñ maiñ

yahī ek gauhar-e-be-bahā mirī zindagī kā hai mā-hasal
mujhe Dar hai terī ye be-ruḳhī ġham-e-ārzū ko miTā na de

jo mujhe yaqīñ ho ki maiñ hī tere harīm-e-ġham kā rafīq huuñ
to balā se gar mujhe bazm-e-aish meñ baar terī atā na de

dushman hai kaun faisla ho hī nahīñ rahā
hai kaun ġham-gusār mujhe kuchh pata nahīñ

uḌtī hai ġham liye paroñ par jo
kaisī ḳhush-rañg sī vo titlī hai

hoñToñ tak aate aate huī vo bhī sard aah
ik āh-e-sard thī jo mirī ġham-gusār-e-dil

tere dāman kī ḳhushbuoñ meñ haiñ ġham
sau suhāne maqām mauj-e-sabā

dard-e-dil zaḳhm-e-jigar kā rāzdāñ koī nahīñ
vāqif-e-asrār-e-ġham āzār-e-jāñ koī nahīñ

paas jis ke kuchh nahīñ māl-o-matā-e-be-bahā
us ko kyā ġham ki muhāfiz pāsbāñ koī nahīñ