Tags-Gham

sozish-e-ġham kā charāġhoñ ko kahāñ andāza
raat chīḳh uThtī hai jalte hue parvāne par

kis ne paa.ī hai ġham-e-yār-e-mohabbat se najāt
ishq kā bojh kahīñ sar se utārā bhī gayā

ye ātish-e-ġham hai ki dam-e-sard se apne
sar-chashma-e-ḳhurshīd-e-daraḳhshāñ meñ lagī aag

ek dil hai ek hasrat ek ham haiñ ek tum
itne ġham kam haiñ jo koī aur ġham paidā kareñ

ahbāb mulāqāt ko jo aate haiñ
nāhaq mujhe ġham de ke chale jaate haiñ

jo shikāyat-e-ġham-e-zindagī kabhī lab par apne na lā sake
vo shab-e-firāq kī dāstāñ bhalā kyā kisī ko sunā sake

husn-e-ġham meñ ek muddat se muqayyad hai 'munīr'
fikr-e-duniyā kā hisār ai haidar-e-karrār toḌ

jab dil meñ tire ġham ne hasrat kī binā Daalī
duniyā mirī rāhat kī qismat ne miTā Daalī

ho na jab tak 'matīn' kaif-e-ġham
aadmī ko ḳhudā nahīñ miltā

maiñ chup rahūñ to goyā ranj-o-ġham-e-nihāñ huuñ
bolūñ to sar se pā tak hasrat kī dāstāñ huuñ

jaañ ghul chukī hai ġham meñ ik tan hai vo bhī mohmal
ma.anī nahīñ haiñ bilkul mujh meñ agar bayāñ huuñ

log usī sūrat pareshāñ haiñ jidhar bhī dekhiye
aur vo kahte haiñ koh-e-ġham to sar bhī ho gayā

vahāñ se ro ke uThe aur muskurā ke chale
balā kā ġham thā hamīñ the ki ġham chhupā ke chale

mujhe kar ke māyūs bole vo 'hasrat'
masarrat ġham-e-jāvedānī kī dekhī

vo mah-rū ai falak phirtā hai har shab merī āñkhoñ meñ
tasavvur ne mire ġham-ḳhāne meñ ik chāñd taarā hai

apnī sanjīda ravish aur udāsī chhoḌūñ
ġham ke asnām ko but-ḳhāna-e-dil meñ toḌūñ

jal uTheñ ġham ke shabistāñ meñ masarrat ke charāġh
barbat-e-dil ke har ik taar ko phir se joḌūñ

ai 'mus.hafī' tasavvur us kā jo sāmne hai
aatā nahīñ shab-e-ġham yak-dam qarār mujh ko

dāġh-e-ġham dil se kisī tarah miTāyā na gayā
maiñ ne chāhā bhī magar tum ko bhulāyā na gayā

be-ḳhatar hai 'azīm' har ġham se
us pe āl-e-nabī kā saayā hai