Tags-Gham

na ho ḳhushī kā gumāñ aise ġham pe kyuuñ 'ḳhāvar'
jo ġham ḳhushī kī tarah qalb-e-mo'atabar meñ rahe

uljhī thī jin meñ ek zamāne se zindagī
kyuuñ ai ġham-e-hayāt vo gesū sañvar ga.e

ġham khāne meñ buudā dil-e-nākām bahut hai
ye rañj ki kam hai mai-e-gulfām bahut hai

ġham meñ ahd-e-shabāb jaatā hai
āsmāñ ḳhaak meñ milātā hai

ġham ko sah jaa.eñ dilāvar ban kar
pī leñ dariyā ko samundar ban kar

ġham to aate hī raheñge paiham
āte-jāte hī raheñge har-dam

ġham-o-andoh kī kuchh baat nahīñ
ye koī lamha-e-haihāt nahīñ

dil kā vajūd ġham ke andhere meñ kho gayā
jaise kisī mazār kā katba miTā huā

dīdanī hai 'yās' apne ranj o ġham kī tuġhyānī
jhuum jhuum kar kyā kyā ye ghaTā barastī hai

din vasl ke ranj-e-shab-e-ġham bhuul ga.e haiñ
ye ḳhush haiñ ki apne ta.iiñ ham bhuul ga.e haiñ

qālīnoñ par baiTh ke azmat vaale sog meñ jab ro.e
dīmak lage zamīr is izzat-e-ġham par kyā itrā.e the

ġham-parvarīda hai dil-e-shorīdgān-e-ishq
furqat kī ek raat hai duniyā kaheñ jise

ġham kā dariyā suukh na jaa.e us kī ravānī kam na paḌe
ḳhūn-e-jigar bhī shāmil kar luuñ aañkh meñ paanī kam na paḌe

jis ne bhī tujh ko chāhā diyā us ko tū ne ġham
duniyā tire fareb koī khaa.e kis tarah

ġham-e-hastī bhalā kab mo'tabar ho
mohabbat meñ na jab tak aañkh tar ho

ġham us kā jo ho ḳhāna-pardāz-e-dil
to 'joshish' kasī chiiz kā ġham na ho

jānte haiñ tire ġham kī qīmat
mānte haiñ ki gunahgār haiñ ham

ġham-o-andoh kā lashkar bhī chalā aatā hai
ek ghoḌ-dauḌ sī hai umr-e-gurezāñ ke qarīb

girya-e-ġham ko hai palkoñ kā ishāra darkār
ek umDā huā tūfān hai mizhgāñ ke qarīb

sharīk-e-dard ban kar apne begāne nahīñ aate
mai-e-ishrat jo piite haiñ vo ġham khāne nahīñ aate