Tags-Gham

paayā to sikhā degā mujhe sho.ala-bayānī
vo harf jo us sīna-e-kohsār meñ ġham hai

ham is tarah to yūsuf-e-be-kārvāñ na the
ai dil tū hī batā tire ġham-ḳhvār kyā hue

matā-o-māl na de daulat-e-tabāhī de
mujhe bhī mumlikat-e-ġham kī bādshāhī de

ġham ko amaañ denā 'āfī'
sadmoñ kī fankārī hai

kartā huuñ zabt-e-ġham ki na khul jaa.e rāz-e-ishq
dil meñ chhupā ke rakhtā huuñ tīr-e-nazar ko maiñ

kyā maiñ bhī pareshānī-e-ḳhātir se qarīñ thā
āñkheñ to kahīñ thiiñ dil-e-ġham-dīda kahīñ thā

abhī tak yaad haiñ vo din ki jab thā
har ik āvāra ġham dīvāna dil kā

kisī aañsū kī ġham hotī sadā par
larazna Dūbnā ghabrānā dil kā

ġham-e-daurāñ ġham-e-jānāñ ġham-e-jāñ
har ik manzil pe thā nazrāna dil kā

apnī tabāhiyoñ kā mujhe koī ġham nahīñ
tum ne kisī ke saath mohabbat nibhā to dī

sho.ala-e-ishq ġham-e-hijr sar-e-shahr-e-hujūm
ik garebān thā sad-chāk se aage tak thā

'manzar' ye shor-e-nauha ġham-e-naz.a meñ hai kyuuñ
nākāmiyoñ ko rote haiñ yā chāra-gar mujhe

ġham-e-firāq meñ taklīf-e-sair-e-bāġh na do
mujhe dimāġh nahīñ ḳhanda-hā-e-bejā kā

hadīs-e-ġham kī tavālat girāñ sahī lekin
kisī ke bas meñ nahīñ iḳhtisār karnā bhī

mirā haal pūchh ke ham-nashīñ mire soz-e-dil ko havā na de
bas yahī duā maiñ karūñ huuñ ab ki ye ġham kisī ko ḳhudā na de

bharī mahfil meñ zabt-e-ġham bā-āsānī bhī karte haiñ
magar tanhā.ī meñ ashkoñ kī arzānī bhī karte haiñ

ishrat-e-zīst kī qasam ishrat-e-musta.ār kyā
ġham bhī jo mustaqil na ho ġham kā bhī e'tibār kyā

miTtī huī hayāt kyā luTtī huī bahār kyā
ya.anī qarīb-e-sub.h-e-ġham sham.a kā e'tibār kyā

koī to hādisa guzrā hai dil par
shab-e-ġham aaj nūrānī bahut hai

āñkheñ ġham-e-firāq se haiñ tar idhar-udhar
ġham kā asar hai aaj barābar idhar-udhar