Tags-Gham

tum ne dekhā hai kabhī ghar ko badalte hue rañg
aao dekho na tamāshā mire ġham-ḳhāne kā

lauh dil ko ġham-e-ulfat ko qalam kahte haiñ
kun hai andāz-e-raqam husn ke afsāne kā

dard kā dard se darmāñ karte
yuuñ ilāj-e-ġham-e-jānāñ karte

ġham-e-daurāñ ko gila hai mujh se
tū hī tū hai mire afsānoñ meñ

'saif' pahlū meñ ye aahaT ġham kī
kaun rotā hai bayābānoñ meñ

kuchh ġham-e-jānāñ kuchh ġham-e-daurāñ donoñ merī zaat ke naam
ek ġhazal mansūb hai us se ek ġhazal hālāt ke naam

yahī hotā hai akasr zindagī meñ
ki thoḌā ġham bhī shāmil ho ḳhushī meñ

kuchh tap-e-ġham ko ghaTā kyā fā.eda is se tabīb
roz nusḳhe meñ agar ḳhurfa ghaTe kaahū baḌhe

peshvā.ī ko ġham-e-jānāñ kī chashm-e-dil se 'zauq'
jab baḌhe naale to us se beshtar aañsū baḌhe

ba-nām-e-ishq ġham-e-mo'tabar zarūrī hai
hayāt ke liye koī hunar zarūrī hai

umr jalvoñ meñ basar ho ye zarūrī to nahīñ
har shab-e-ġham kī sahar ho ye zarūrī to nahīñ

kuchh mire kirdār meñ likkhā thā ġham
kuchh mirā radd-e-amal bejā na thā

ġham-e-daurāñ bhī hai yuuñ jaise mirā yaum-e-hisāb
maiñ to duniyā meñ bhī mahshar se nikalne kā nahīñ

'purnam' ġham-e-ulfat meñ tum aañsū na bahāo
is aag ko paanī se bujhāyā nahīñ jaatā

dam koī dam kā hai mehmāñ alvidā.a
dard-o-ġham mere dil-o-jāñ alvidā.a

har taraf hai sukūt-e-ġham taarī
dāstāñ kyā sunā rahī hai raat

jalne vaalo tā-ba-imkāñ zabt soz-e-ġham karo
aag jab bhaḌke charāġh-e-sarhad-e-manzil bano

maiñ ne kaise pyāre pyāre log sauñpe the tujhe
ai ġham-e-jāñ ai ġham-e-jāñ ye mirī duniyā nahīñ

bikhar gayā to mujhe koī ġham nahīñ is kā
ki raaz mujh pe ka.ī vā hue bikharte hue