Tags-Gham

koī mausam ho yahī soch ke jī lete haiñ
ik na ik roz shajar ġham kā harā to hogā

kaun letā thā ġham-e-arz-o-samā mere ba.ad
marne vaalā koī paidā na huā mere ba.ad

har ġham sahnā aur ḳhush rahnā
mushkil hai āsān nahīñ hai

maar Daalā ātish-e-ġham ne jalā kar ai 'munīr'
ThanDī kar diiñ sog meñ us gul ne saarī chūḌiyāñ

kyuuñ sharīk-e-ġham banāte ho kisī ko ai 'qatīl'
apnī suulī apne kāñdhe par uThāo chup raho

mohabbat chāhiye bāham hameñ bhī ho tumheñ bhī ho
ḳhushī ho is meñ yā ho ġham hameñ bhī ho tumheñ bhī ho

'zafar' se kahtā hai majnūñ kahīñ dard-e-dil mahzūñ
jo ġham se fursat ab ik dam hameñ bhī ho tumheñ bhī ho

sadā.eñ do ki koī kārvān-e-ġham Thahre
hameñ to raas na ā.eñge din sañvarte hue

zabt kī koshish hai jān-e-nā-tavāñ mushkil meñ hai
kyuuñ ayaañ ho aañkh se vo ġham jo pinhāñ dil meñ hai

kyā hāsil-e-kār-e-ġham-e-ulfat hai ki majnūñ
ab dasht-navardī ko bhī tayyār nahīñ haiñ

ab tujh ko salām ai ġham-e-jānāñ ki jahāñ meñ
kyā ham se dīvānoñ ke ḳharīdār nahīñ haiñ

ojhal hue jaate haiñ nigāhoñ se do aalam
tum aaj kahāñ ho ġham-e-furqat ke sahāro

hamīñ ne sāġhar-e-ġham muntaḳhab kiyā 'ārif'
vagarna bazm meñ kuchh sāġhar-e-tarab bhī chale

zabt-e-ġham-e-firāq kī dil meñ kahāñ sakat
zālim ke rūThne kī adā kyā karegī aaj

ye maanā sail-e-ashk-e-ġham nahīñ kuchh kam magar 'arshad'
zarā utrā nahīñ dariyā ki banjar jaag uThtā hai

ma.asūm ko phir maar diyā kokh meñ maañ kī
qisse jo sune ham ne vo ġhamnāk bahut the

ehsās ke har rañg ko apnā letā
hañs letā gā letā ġham khā letā

na.e zaḳhm haiñ na.ī koñpleñ abhī dil pe ġham kī bahār hai
ye duā karo ki ḳhizāñ meñ bhī ye daraḳht yūñhī harā rahe

yahī dil-lagī tumhārī kisī aah meñ badaltī
jo hamāre zaḳhm ginte, kabhī ġham shumār karte

muḳhtasar qissa-e-ġham ye hai ki dil rakhtā huuñ
rāz-e-kaunain ḳhulāsa hai is afsāne kā