Tags-Gham

kasrat-e-ġham meñ bhī akasr muskurā lete haiñ ham
zulmat-e-hastī meñ yuuñ sham.eñ jalā lete haiñ ham

kuchh na pūchho himmatoñ se kaam kyā lete haiñ ham
ġham ko baada dil ko paimāna banā lete haiñ ham

mushkileñ dil meñ na.ī sham.eñ jalā detī haiñ
ġham se bujh jaanā to durveshoñ kā dastūr nahīñ

jaane kyā ġham thā ki chup oḌh ke vo baiTh rahā
vo kam-āmez to hai yaaro pa maġhrūr nahīñ

us kā ġham hai merā ġham
merā ġham kyuuñ us kā nahīñ

ḳhush ho na zamāna mere ġham par
aa.egā ye daur-e-jām sab tak

har ġham ko uḌā diyā hañsī meñ
tum pesh-e-nazar rahe ho jab tak

jaa.e hai jī najāt ke ġham meñ
aisī jannat ga.ī jahannam meñ

be-ḳhabar kitne the 'mas.ū' rumūz-e-ġham se
maiñ jo royā to kahā dard se rotā kyā hai

tumhārā ġham hai rishta-dār merā
tumhārī yaad hī merā nasab hai

nākām-e-nashāt-e-aish-o-ḳhushī har vaqt ke ranj-o-ġham ne kiyā
jo tum ne kahā vo dil ne kiyā jo dil ne kahā vo ham ne kiyā

hasrat ko bhī hasrat aatī hai ibrat ko bhī ibrat aatī hai
vo shakl hamārī ġham meñ huī ye haal hamārā ġham ne kiyā

duniyā ko Duboyā ashkoñ se tūfān uThāyā ro ro kar
dariyā-e-ġham ulfat meñ bapā ai 'nūh' talātum ham ne kiyā

bezār aa na jaa.eñ ġham-e-jān-o-tan se ham
apne vatan meñ rah ke bhī haiñ be-vatan se ham

farsh-e-maḳhmal siiñ mujh kuuñ behtar hai
ġham ke kāñToñ kī sej par sonāñ

gard-e-ġham siiñ jo dil huā melā
apne aañsū ke aab siiñ dhonāñ

dāstān-e-ġham ham ne kah bhī dī to kyā hogā
aur baḌh ga.ī dil kī be-kalī to kyā hogā

zindagī to apnī hai luT ga.ī to phir kyā ġham
ġham tirī amānat hai chhin ga.ī to kyā hogā

har ik ḳhushī ne tire ġham kī aabrū rakh lī
har ik ḳhushī se tire ġham ne intiqām liyā

dariyā bhī ho to kaise Dubo deñ zamīn ko
palkoñ ke paar ġham kā samundar koī to aa.e