Tags-Gham

na sakat hai zabt-e-ġham kī na majāl-e-ashk-bārī
ye ajiib kaifiyat hai na sukūñ na be-qarārī

tirā ek hī sitam hai tire har karam pe bhārī
ġham-e-do-jahāñ se de dī mujhe tū ne rustagārī

mirī zindagī kā hāsil tire ġham kī pāsdārī
tire ġham kī aabrū hai mujhe har ḳhushī se pyārī

kitnī mushkil se ġham-e-dost bayāñ hotā hai
ashk thamtā hai na āñkhoñ se ravāñ hotā hai

ham duniyā ko de kar ḳhushiyāñ ġham badle meñ lete haiñ
DhūñDe se bhī ab na mileñge ham jaise dīvāne log

zabt-e-rāz-e-ġham pe sau jāneñ bhī kar dete nisār
kyā batā.eñ bas zabāñ par un kā naam aa hī gayā

mah-o-nujūm kī duniyā sajī huī hai magar
fasāna ġham kā mire itnā muḳhtasar bhī nahīñ

siine meñ zabt-e-ġham se chhālā ubhar rahā hai
sho.ale ko band kar ke paanī banā rahe haiñ

dosh par bār-e-shab-e-ġham liye gul kī mānind
kaun samjhe ki mohabbat kī zabāñ haiñ ham log

ab to ġham-ḳhāne meñ apne ik chaTā.ī bhī nahīñ
aag is ghar ko lagī aisī ki jo thā jal gayā

abhī to nā-mukammal nazm kā ik āḳhirī misra kitāb-e-hijr meñ tahrīr karnā hai
ḳhas-o-ḳhāshāk-e-ġham aslāf meñ taqsīm ho jaa.eñ to sar se bojh utre

kahīñ gar farq niklegā to bas shiddat kā kuchh varna
yahāñ par ġham hamāre aur tumhāre ek jaise haiñ

ġham ġhalat karne ko maiñ kitnī piyūñ
rāt-din ġham kī ghaTā achchhī nahīñ

vo ābrū-e-vahshat laa.eñ to ab kahāñ se
vo jannat-e-tamannā vo dasht-e-ġham na DhūñDeñ

jaañ dī 'sarosh' ham ne rāh-e-ḳhulūs-e-ġham meñ
fard-e-amal hamārī dair-o-haram na DhūñDeñ

tum jo qātil na masīhā Thahre
na ilāj-e-shab-e-hijrāñ na ġham-e-chārāgarāñ

hujūm-e-ġham ne sikhāne kī laakh koshish kī
hameñ to aah bhī karnā na umr bhar aayā

vo ġham jo abhī mile nahīñ haiñ
maiñ un kā malāl kar rahā huuñ