Tags-Gham

hayāt kī be-ruḳhī na.ī hai na apnī kam-mā.egī na.ī hai
phir aaj jazbāt-e-ġham kī maujoñ meñ kaisī ye bekalī na.ī hai

dil-e-nāzuk mutahammil nahīñ ġham ho ki surūr
phuul maqtūl hai ḳhud apnī hī ra.anā.ī kā

ġham meñ parvānoñ ke ik muddat se
sham.a ghultī hī chalī jaatī hai

ik imārat ki uThānī hai sar-e-dasht-e-vajūd
so ġham-e-jāñ tujhe buniyād kiyā hai ham ne

zamāne bhar kī ḳhushiyoñ kā hai hāmil
vo ġham jo terī ulfat ne diyā hai

maiñ kabhī kā mar bhī rahtā na ġham-e-firāq sahtā
agar apnī zindagī par mujhe iḳhtiyār hotā

mujh ko bone the dil meñ aur kisī ke ġham 'āfī'
lekin dil kī surḳhī zamīñ par ab tak us kā qabza hai

zindagī aur marg shādī aur ġham aur nek-o-bad
ek saañ haiñ sab vahāñ lekin maqām-e-ġhaur hai

ye hādsa bhī ajab hai ki tere ġham ke sivā
kisī bhī ġham ko ġham-e-mo'tabar kahā na gayā

nafas nafas meñ thā ehsās-e-ḳhāna-vīrānī
ḳharāba-e-ġham-e-hastī ko ghar kahā na gayā

dūsroñ ke ġham meñ rotī thiiñ jo sham.eñ bujh ga.iiñ
aag meñ ġhairoñ kī jalte the jo parvāne ga.e

zindagī ġham ke añdheroñ meñ sañvarne se rahī
ek tanvīr-e-hayāt aaj ubharne se rahī

ab ishq se ziyāda ġham-e-tark-e-ishq hai
ye aag bujh ke aur jalā.e to kyā karūñ

tā-chand 'suhail' afsurda-e-ġham kyā yaad nahīñ tārīḳh-e-haram
īmāñ ke jahāñ paḌte haiñ qadam paidā vahīñ zamzam hotā hai

siine ke daaġh un ko dikhā.e na jā sake
mujh se fasāne ġham ke sunā.e na jā sake

matā-e-ġham chhupā kar kyuuñ na rakkhūñ
havāle ye amānat kar gayā vo

huī ye kasrat-e-ġham se talaf kaifiyat-e-shādī
ki sub.h-e-īd mujh ko bad-tar az-chāk-e-garebāñ hai

ġham āġhosh-e-balā meñ parvarish detā hai āshiq ko
charāġh-e-raushan apnā qulzum-e-sarsar kā marjāñ hai

dost ḳhush hote haiñ jab dost kā ġham dekhte haiñ
kaisī duniyā hai ilāhī jise ham dekhte haiñ

kab se maiñ kunj-e-ġham-e-dil meñ chhupā baiThā huuñ
yaad kartī hai mujhe shorish-e-daurāñ ab tak