Tags-Gham

mere hisse meñ bhī hai daulat-e-bedārī-e-shab
ik ḳhalish sī hai matā-e-ġham-e-pinhāñ ab tak

na sah sakūñgā ġham-e-zāt go akelā maiñ
kahāñ tak aur kisī par karūñ bharosā maiñ

is ġham-kade se kuchh na lagā haath hamāre
āh-e-dil-e-sozāñ hī chalī saath hamāre

dard-o-ġham-o-andoh-o-alam nāla-e-jāñ-kāh
haiñ dushman-e-jānī sabhī yak zaat hamāre

ġham tujh ko pyārā tū mujh ko pyārī
dil kī tamannā nāzuk hasīna

koī chārasāz koī ġham-gusār
bas ki aisā rāz-dāñ merā rahe

'figār' āh-o-fuġhāñ se kam na thī azmat mire ġham kī
magar kuchh aur rutba baḌh gayā soz-e-nihāñ ho kar

kyā zikr aish-rafta-e-ahd-e-bahār kā
ġham bhī mujhe qubūl hai gar jāvedāñ rahe

na dozaḳh hai na jannat hai to 'bāsit'
mire a.amāl-e-ġham kā kyā silā hai

chhīn letā hai vo pahle mirī ḳhushiyoñ kī vaj.h
aur phir mujh se mire ġham kā sabab pūchhtā hai

rāhat kī justujū meñ ḳhushī kī talāsh meñ
ġham pāltī hai umr-e-gurezāñ na.e na.e

ġham aur ḳhushī meñ farq na mahsūs ho jahāñ
maiñ dil ko us maqām pe laatā chalā gayā

aish-o-ishrat ko na de tū raah dil meñ ai 'hasan'
dard-o-ġham hī se kisī ke is ko mālā-māl kar

dil vasl kī lazzat kā talabgār hai lekin
takmīl-e-tamannā ġham-e-furqat hai to haañ aur

hāl-e-ġham kah ke ġham baḌhā baiThe
tiir maare the tiir khā baiThe

aise mujh par bhī tire ġham ke nishāñ dikhte haiñ
jaise mausam kā imārat pe asar paḌtā hai

maiñ ilāj-e-ġham bhī na kar sakā tirā jaam to bhī na bhar sakā
hai har ek moḌ pe tishnagī tire gaañv meñ mire shahr meñ

ye hasad jahāñ kī nazar meñ hai ġham-e-'dānā' un ke jigar meñ hai
hai sabhī ko pyaar se dushmanī tire gaañv meñ mire shahr meñ

vo ḳhafā haiñ ki ham ġharīboñ ko
ġham pe kuchh iḳhtiyār sā kyuuñ hai

merī āñkhoñ ke ḳhvāb to ġham haiñ
vo magar be-qarār sā kyuuñ hai