Tags-Gham

yuuñ to hamdard zamāna thā ba-zāhir lekin
kisī sūrat se ilāj-e-ġham-e-pinhāñ na huā

dil bahaltā bhī to kis tarah bahaltā shab-e-ġham
sāz-o-sāmāñ na huā naġhma-ehirmāñ na huā

thakā āḳhir ko majnūñ ġham se rāh-e-ishq meñ mere
ġhubār-e-ḳhātir o aañsū kī bārish dekh kar chahlā

ġham ye nahīñ ki baḳht ne barbād kar diyā
ġham hai to ye ki ḳhvāhish-e-ta.amīr chhīn lī

mizāj-e-ġham samajhtā kyuuñ nahīñ hai
mirā idrāk mujh sā kyuuñ nahīñ hai

kabhī ham ḳhirad se the āshnā hue ab haiñ ahal-e-junūñ-nashīñ
is hālat-e-ġham-e-hijr meñ koī aa ke ham ko uThā na de

mirī tarah bhī koī zabt-e-ġham se kaam na le
ki apne-āp se poshīda haal hai apnā

apnī daulat ko jigar par tīr-e-ġham khāte hue
dekhtā hai mulk-e-dushman kī taraf jaate hue

uljhī thī jin meñ ek zamāne se zindagī
kyuuñ ai ġham-e-hayāt vo gesū sañvar ga.e

go ye ġham hai ki vo habīb nahīñ
par ḳhushī hai koī raqīb nahīñ

tujh se ai dil ḳhudā to hai aqrab
ġham nahīñ but agar qarīb nahīñ

siite haiñ sozan se chāk-e-sīna kyā ai chārasāz
ḳhār-e-ġham siine meñ apne misl-e-sozan aap haiñ

baḌe baḌe ġham khaḌe hue the rasta roke rāhoñ meñ
chhoTī chhoTī ḳhushiyoñ se hī ham ne dil ko shaad kiyā

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

ġham ko sabāt hai na ḳhushī ko qarār hai
jo kal thā ḳhanda-rez vo aaj ashk-bār hai

'āsī' tarab-kada thā kabhī ye dil-e-hazīñ
ai vaa.e aaj hasrat-o-ġham kā mazār hai

kitnī saj-dhaj hai nigār-e-ġham-o-ālam kī aaj
is kī shoḳhī ko zarā aur nikhāro logo

kyā ajab fart-e-ḳhushī se hai jo giryāñ aadmī
kasrat-e-ġham meñ nazar aatā hai ḳhandāñ aadmī

ye lamha-e-hāzir to hai kaunain kā hāsil
ham haal ko nazr-e-ġham-e-fardā nahīñ karte