Tags-Gham

sho.ala-zan hai ġham-e-hayāt 'samad'
parbatoñ se dhuāñ nikaltā hai

har ibtidā ko intihā kā hai gumāñ
har intihā ko ġham kisī kamī kā hai

go yaad hai ab tak mujhe ġham kā mausam
par Thiik nahīñ dil kī kahānī likhnā

apne maazī ke har ik ġham ko bhulā de varna
choT phir ubhregī phir dard purānā hogā

piiv ke ġham meñ anjho bahātā huuñ
kyā bahāne kā vaqt aayā hai

gayā to bhuul gayā koī dard-e-zaḳhm kā haal
vo kashmakash hai ki ġham se lipaT rahā huuñ maiñ

sirf tere lab-o-ruḳh kī nahīñ tasvīr-e-chaman
mere bhī ġham ke ka.ī rañg ḳhizāñ meñ hoñge

vo ek shaḳhs jo manzil bhī rahguzār bhī hai
nishāt-o-kaif meñ Duubā hai ġham-gusār bhī hai

khañDar sā ek makāñ tāktā hai rastoñ ko
na jaane aaj kahāñ is ke ġham shanās rahe

kyā dukh hai hameñ kyā ġham hai hameñ kyuuñ jaa.eñ kisī se kahne ko
kaliyoñ kī jau izzat kar na sake vo dard-e-chaman kyā samjheñge

kyuuñ nāhaq le kar baiTh ga.e ġham-hā-e-musalsal kā qissa
vo dard kī qīmat kyā jāneñ vo dil kī jalan kyā samjheñge

ḳhastagī dekhī hai 'jāved' fasīl-e-dil kī
is pe buniyād shab-e-ġham kī na Daalī jaa.e

yahāñ to ek bhī ġham-āshnā nahīñ apnā
farishte mujh ko kahāñ be-naqāb le aa.e

mire saath chalne vaale tujhe kyā milā safar meñ
vahī dukh-bharī zamīñ hai vahī ġham kā āsmāñ hai

kaisā lamha thā ki ham tark-e-safar kar baiThe
ḳhvāb kam the na tire ġham kā asāsa kam thā

nāmūs-e-zindagī ġham-e-insāñ meñ Dhaal kar
suutī hai raat jaam se sūraj nikāl kar

kasrat-e-ġham se dil lagā rukne
hazrat-e-dil meñ aaj dañggal hai

mar gayā kohkan isī ġham meñ
aañkh ojhal pahāḌ ojhal hai

ai ġham mujhe tamām shab-e-hijr meñ na khā
rahne de kuchh ki sub.h kā bhī nāshtā chale

is na.e ġham se kināra bhī to ho saktā hai
ishq phir ham ko dobāra bhī to ho saktā hai