Tags-Gham

vasl us kā mayassar nahīñ sach kahtā hai 'āsif'
kyuuñ apne ta.iiñ rakhtā hai masrūf tū ġham kā

paañv meñ agar tauq-o-salāsil haiñ to kyā ġham
ai ham-safaro farq na raftār meñ aa.e

dekh lāzim hai ġham zindagī ke liye
so guzāre shab-e-ġham ḳhushī ke liye

ai asīrān-e-tilism-e-shab-e-ġham so jaao
sham-e-ummīd kī lo ho ga.ī kam so jaao

ġham ke māroñ ko sukūñ miltā hai maiḳhāne meñ
jaao chheḌo na hameñ shaiḳh-e-haram so jaao

dil dhaḌakne kī bhī āvāz hai sākit 'māhir'
ab nahīñ koī sharīk-e-shab-e-ġham so jaao

rūdād-e-ġham-e-ulfat un se ham kyā kahte kyūñkar kahte
ik harf na niklā hoñToñ se aur aañkh meñ aañsū aa bhī ga.e

bahut se ġham chhupe hoñge hañsī meñ
zarā in hañsne vāloñ ko TaTolo

ġham se miltā hai mirī fikr ko is tarah farāġh
jis tarah tā.ir-e-par-basta ke par khulte haiñ

ġham-e-dil avvalīñ daur-e-tamannā kī amānat hai
naved-e-aish agar suniye nasīb-e-dushmanāñ kahiye

tum kabhī mā.il-e-karam na hue
merī qismat ke duur ġham na hue

jin kī ḳhātir 'hazīñ' uThā.e ġham
vo bhī apne sharīk-e-ġham na hue

un se har haal meñ tum silsila-jumbāñ rakhnā
kuchh madavā-e-ġham-e-gardish-e-daurāñ rakhnā

dard meñ Duubī fazā aaj bahut hai shāyad
ġham-zada raat hai taare nahīñ achchhe lagte

bistar-e-hirmāñ pe vo pahlū badalnā baar baar
ġham kī rātoñ meñ vo qahr-e-āsmānī yaad hai

ḳhushī meñ kyā hai jo ġham meñ nahīñ kyā baat kah Daalī
tumheñ ye ilm kī gahrā.iyāñ barbād kar deñgī

ġham nahīñ bijlī gire jal jaa.e dil ho jaa.e ḳhaak
arz ik 'bismil' kī hai ki muskurā kar dekh lo

ye nahīñ hai ki maiñ is dard se āgāh nahīñ
tū ġham-e-dahr pe rotī hai patā hai mujh ko

ḳhud-kushī qabr maiñ bhejegī hameñ ġham ko nahīñ
marg-e-hastī meñ kahāñ hai ġham-e-hastī kā ilaaj

ġham ke zarroñ ko sameTūñ ki baḌe kaam ke haiñ
ye simaT jaa.eñ to ho jaa.e himāla paidā